Një ngjarje tragjike dhe tronditëse ka ndodhur mbrëmjen e djeshme në qytetin e Prilepit, ku një 63-vjeçar vrau dy të afërm të tij, sulmoi policinë dhe në fund kreu vetëvrasje.
Sipas njoftimit zyrtar nga Ministria e Punëve të Brendshme të Maqedonisë së Veriut, autori fillimisht ka qëlluar për vdekje një burrë 43-vjeç dhe djalin e tij 11-vjeçar, të cilët ishin familjarë të tij. Ngjarja ndodhi brenda në shtëpinë e autorit, pas një konflikti të brendshëm që ende nuk është sqaruar plotësisht.
Pasi policia mbërriti në vendngjarje, 63-vjeçari hodhi një mjet shpërthyes drejt efektivëve dhe hapi zjarr ndaj tyre. Për fat të mirë, askush nga forcat e rendit nuk u lëndua. Menjëherë pas këtij veprimi, ai kreu vetëvrasje.
Prokuroria Themelore e Prilepit ka dalë në vendngjarje dhe ka nisur hetimet për të zbardhur motivet e kësaj tragjedie familjare që ka tronditur opinionin publik në mbarë vendin.
