Presidenti amerikan, Donald Trump insistoi të enjten se Egjipti dhe Jordania do të pranojnë banorët e dëbuar nga Gaza, megjithëse këto dy shtete arabe hodhën poshtë planin për të zhvendosur palestinezët nga territori i tyre.

Komentet e liderit amerikan erdhën një ditë pasi presidenti egjiptian, Abdel Fattah al-Sisi dhe Mbreti jordanez, Abdullah II hodhën poshtë çdo mundësi të zhvendosjes me forcë të banorëve të Gazës pas luftës mes Hamasit dhe Izraelit.

“Ata do ta bëjnë këtë. Ata do ta bëjnë. Ne po bëjmë shumë për ta, dhe ata do ta bëjnë”, tha 78-vjeçari për gazetarët në Zyrën Ovale kur u pyet për reagimin e Egjiptit dhe Jordanisë dhe nëse do të shqyrtonte vendosjen e taksave për cilindo vend për t’i shtyrë ata të pranojnë planin.

Pas arritjes së armëpushimit mes Izraelit dhe Hamasit më 19 janar, Trump paraqiti javën e kaluar një plan për “pastrimin” e Rripit të Gazës dhe për zhvendosjen e palestinezëve në lokacione “më të sigurta” si Egjipti ose Jordania. Ai tha se lufta 15-mujore e kishte shndërruar territorin palestinez në një “vend shkatërrimi”.

Përfaqësuesi i Trumpit për Lindjen e Mesme, Steve Witkoff, vizitoi Gazën këtë javë, siç njoftoi Shtëpia e Bardhë, për të mbështetur armëpushimin e brishtë. Ai takoi gjithashtu kryeministrin izraelit, Benjamin Netanyahu, shkruan aljazeera.

Presidenti egjiptian Sisi, aleat i rëndësishëm i SHBA-së, tha të mërkurën në përgjigjen e parë publike ndaj komenteve të Trumpit se zhvendosja e “popullit palestinez nga toka e tij është padrejtësi në të cilën ne nuk mund të marrim pjesë”.

Mbreti jordanez, Abdullah II veçoi “qëndrimin e fortë të vendit të tij për nevojën e ruajtjes së palestinezëve në tokën e tyre”.

Nga fillimi i luftës mes Izraelit dhe Hamasit në tetor të vitit 2023, si Egjipti ashtu edhe Jordania kanë paralajmëruar kundër planeve për të zhvendosur palestinezët nga Gaza dhe Bregu Perëndimor përtej kufijve të tyre.