Presidenti amerikan Donald Trump ka ndezur shpresat për lirimin e dhjetë pengjeve të tjera nga Gaza, duke deklaruar se kjo do të ndodhë “së shpejti”, megjithëse pa dhënë detaje të tjera.
Deklarata e tij u bë gjatë një darke me ligjvënës në Shtëpinë e Bardhë, ku Trump lavdëroi përpjekjet e të dërguarit të tij të posaçëm, Steve Witkoff, për ndërmjetësimin e marrëveshjes.
“E kemi kthyer shumicën e pengjeve. Së shpejti do të kemi edhe dhjetë të tjerë dhe shpresojmë që gjithçka të përfundojë shpejt,” tha Trump.
Bisedimet intensive mes negociatorëve izraelitë dhe përfaqësuesve të Hamasit po zhvillohen në Doha që nga 6 korriku, nën mbështetjen e SHBA-së, për një marrëveshje që përfshin armëpushim 60-ditor dhe shkëmbim të pengjeve.
Sipas këtij propozimi, Hamas do të lirojë dhjetë pengje dhe do të dorëzojë trupat e 18 të tjerëve, ndërsa Izraeli do të lirojë një numër të burgosurish palestinezë.
Zëdhënësi i krahut të armatosur të Hamasit ka shprehur gatishmërinë për një armëpushim të përkohshëm, por ka paralajmëruar se grupi mund të rikthehet në kërkesën për një marrëveshje gjithëpërfshirëse nëse negociatat dështojnë.
Lufta në Gaza ka shkaktuar një bilanc tragjik – mbi 58,600 palestinezë dhe rreth 1,650 izraelitë e shtetas të huaj kanë humbur jetën që nga 7 tetori 2023.
Trump ka përsëritur prej javësh se marrëveshja është “e pashmangshme”, megjithëse një marrëveshje finale ende nuk është arritur.
