Presidenti i Shteteve të Bashkuara, Donald Trump, ka reaguar me një seri postimesh në rrjetin Truth Social lidhur me zhvillimet e fundit në Ngushticën e Hormuzit, ku ka rikthyer edhe kritikat e ashpra ndaj NATO-s.
Në një prej postimeve të tij, Trump tha se pas përfundimit të situatës në Ngushticën e Hormuzit ka marrë një telefonatë nga NATO, duke shtuar se u kishte kërkuar të qëndronin larg.
“Tani që situata në Ngushticën e Hormuzit ka përfunduar, mora një telefonatë nga NATO duke pyetur nëse kishim nevojë për ndihmë. U thashë të qëndronin larg, përveçse nëse duan thjesht të ngarkojnë anijet e tyre me naftë. Ata ishin të padobishëm kur ishte e nevojshme, një tigër prej letre!”, ka shkruar Trump.
Në postimet e tjera, ai ka falënderuar Arabinë Saudite, Emiratet e Bashkuara Arabe dhe Katarin, duke i vlerësuar për “guximin e madh dhe ndihmën” në menaxhimin e situatës.
Trump është ndalur edhe te çështja e sigurisë detare, duke deklaruar se Irani, me ndihmën e Shteteve të Bashkuara, ka hequr ose është në proces të heqjes së të gjitha minave detare në zonë.
Ndërkohë, ai ka theksuar se hapja e ngushticës nuk ka lidhje me armëpushimin në Liban.
“Sërish! Kjo marrëveshje nuk lidhet në asnjë mënyrë me Libanin, por ne do ta bëjmë Libanin të mrekullueshëm sërish!” ka shkruar Trump.
