Ekspozimi ndaj temperaturave të larta dhe valëve të përsëritura të nxehtësisë mund të përshpejtojë plakjen tek njerëzit, me efekte të krahasueshme me dëmet e shkaktuara nga pirja e duhanit, alkooli ose një dietë e dobët, ka zbuluar një studim i ri. Shkencëtarët paralajmërojnë se temperaturat ekstreme, gjithnjë e më të zakonshme për shkak të krizës klimatike, mund të shkaktojnë dëme afatgjata në shëndetin e miliarda njerëzve në të gjithë botën, shkruan The Guardian.
Ndërsa valët e të nxehtit dihet se shkaktojnë një rritje të vdekjeve të parakohshme në afat të shkurtër, siç janë gati 600 rastet e regjistruara në Angli gjatë valës së të nxehtit të qershorit, kjo analizë e re është një nga të parat që vlerëson ndikimin afatgjatë.
Çfarë zbuloi studimi?
Studiuesit ndoqën 25,000 njerëz në Tajvan për 15 vjet, duke krahasuar ekspozimin e tyre ndaj valëve të të nxehtit me moshën e tyre biologjike, një masë e shëndetit të përgjithshëm. Rezultatet treguan se mosha biologjike e një personi që përjetoi katër ditë shtesë me valë të të nxehtit gjatë një periudhe dyvjeçare u rrit me rreth nëntë ditë. Efekti ishte shumë më i theksuar tek punëtorët manualë, të cilët kalojnë më shumë kohë jashtë – mosha e tyre biologjike u rrit deri në 33 ditë.
Ndërsa këto rritje mund të duken të vogla, studiuesit theksojnë se ato janë për një periudhë prej vetëm dy vitesh dhe po hetojnë efektin kumulativ të valëve të nxehtësisë në plakjen gjatë gjithë jetëgjatësisë.
Ndryshimi i paradigmës
“Nëse ekspozimi ndaj valëve të të nxehtit grumbullohet gjatë disa dekadave, ndikimi në shëndet do të jetë shumë më i madh nga sa raportuam”, tha Dr. Kui Guo i Universitetit të Hong Kongut, i cili udhëhoqi studimin. “Valët e të nxehtit po bëhen gjithashtu më të shpeshta dhe më të gjata, kështu që ndikimi në shëndet mund të jetë shumë më i madh [në të ardhmen].”
Profesori Paul Beggs i Universitetit Macquarie në Sydney, i cili nuk ishte i përfshirë në studim, tha se gjetjet përfaqësonin një ndryshim paradigme. “Shumë prej nesh kanë përjetuar valë të nxehti dhe kanë mbijetuar të padëmtuar – ose të paktën kështu mendonim. [Ky hulumtim] tani tregon se ekspozimi ndaj valëve të të nxehtit ndikon në shkallën me të cilën plakemi.”
Ai shtoi se kjo, së bashku me gjetjet e mëparshme rreth ndikimit negativ të nxehtësisë në zhvillimin e trurit tek fëmijët, ndryshon kuptimin tonë për ashpërsinë e efekteve shëndetësore të nxehtësisë. “Ndikimi mund të ndodhë në çdo moshë dhe mund të zgjasë gjatë gjithë jetës”, përfundoi ai.
Metodologjia dhe kufizimet
Studimi i ri, i botuar në revistën Nature Climate Change, përdori një sërë testesh mjekësore – duke përfshirë presionin e gjakut, shënuesit inflamatorë, kolesterolin dhe funksionin e mushkërive, mëlçisë dhe veshkave – për të përcaktuar moshën biologjike të secilit person. Ai zbuloi se numri i përgjithshëm i ditëve të përjetuara në një valë të nxehti kishte ndikimin më të madh në plakjen e përshpejtuar.
Është e rëndësishme të theksohet se pjesëmarrësit në studim ishin, mesatarisht, më të rinj, më të shëndetshëm dhe më të arsimuar se popullata e përgjithshme. Meqenëse njerëzit e moshuar dhe më të sëmurë janë më të ndjeshëm ndaj nxehtësisë, ndikimi i vërtetë në plakjen e popullatës së përgjithshme ka të ngjarë të jetë edhe më i madh se sa është raportuar. Studimi gjithashtu nuk përfshiu të dhëna mbi faktorë individualë, siç është koha e kaluar jashtë ose përdorimi i ajrit të kondicionuar, gjë që kërkon kërkime të mëtejshme.
