Zgjerohet hetimi për zjarrin tragjik në Kërçovë: Të arrestuar ish-ministra dhe zyrtarë të lartë, në mesin e tyre edhe ambasadori në Norvegji

Sipas burimeve të 360 Gradë, Prokuroria ka zgjeruar hetimet për zjarrin tragjik që ndodhi më 16 mars në lokalin e njohur si “Kabarja Puls” në Koçan, ku humbën jetën 61 persona. Hetimi është zgjeruar ndaj 23 personave të tjerë të dyshuar, prej të cilëve 19 janë arrestuar ose janë në proces arrestimi.

Ndër të arrestuarit janë ish-ministrat e Ekonomisë nga radhët e BDI-së, Valon Saraçini dhe Bekim Neziri, si dhe ministri aktual pa portofol dhe ish-drejtor i Drejtorisë për Mbrojtje dhe Shpëtim (DMSH), Shaban Saliu. Po ashtu, është arrestuar edhe drejtori aktual i DMSH-së, Xhevat Selami, përfaqësues i koalicionit VLEN.

Sipas informatave të 360 Gradë, njëri nga të dyshuarit, Driton Kuçi – ish-ministër i Ekonomisë dhe aktualisht ambasador i Maqedonisë së Veriut në Norvegji – nuk ndodhet në vend, dhe ndaj tij pritet të ndërmerren masa të mëtejshme.

Hetimi përfshin përgjegjësi institucionale që datojnë nga viti 2012 e deri në ditën e ngjarjes tragjike, ku dyshohet se ka pasur neglizhencë sistematike si në Ministrinë e Ekonomisë, ashtu edhe në Drejtorinë për Mbrojtje dhe Shpëtim. Ndërkohë, udhëheqësia e Inspektoratit Shtetëror të Tregut nuk është përfshirë në hetime.

Sipas të njëjtave burime, të gjithë ata që kanë ushtruar funksione si ministra të Ekonomisë dhe drejtorë të DMSH-së që nga viti 2012 janë arrestuar, me përjashtim të ministrit aktual të Ekonomisë, Besar Durmishi, i cili nuk është subjekt i hetimit.

Në Prokurorinë Themelore Publike të Koçan është duke u zhvilluar hetimi për këtë rast që tronditi opinionin publik.