Me rastin e Ditës Ndërkombëtare të Sportit për Zhvillim dhe Paqe, koalicioni VLEN ka përcjellë një mesazh të fuqishëm solidariteti dhe mbështetjeje për të rinjtë dhe fëmijët në vend. Duke theksuar rolin transformues të sportit, VLEN deklaron se “Sporti është fuqi. Sporti është barazi. Sporti është e drejtë!”

“Çdo fëmijë meriton të vrapojë pas ëndrrave, jo pas pengesave që ua ndalin hovin,” thuhet në deklaratën e tyre, duke nënvizuar nevojën për një qasje më të drejtë dhe gjithëpërfshirëse në politikat sportive – nga lagjet deri në sallat zyrtare të sportit.

Në këtë ditë simbolike, zëvendësministrja e Sportit, znj. Safije Sadiki Shahini, ka dërguar një mesazh të veçantë përmes një videoje sensibilizuese, ku flet për vizionin e një të ardhmeje më të barabartë përmes sportit. “Sporti nuk është thjesht garë apo fitore, por një mundësi për bashkim, përfshirje dhe rritje për çdo të ri e të re,” u shpreh ajo.

VLEN bën thirrje për më shumë mbështetje, investime dhe politika të qëndrueshme që fuqizojnë sportin si një mjet për paqe, zhvillim dhe drejtësi sociale.