Më 03 janar 2026, në orën 18:25, në SPB Tetovë është raportuar një rast i pazakontë. Gjatë kryerjes së punimeve me bager në aksin rrugor ndërmjet fshatit Kryqet e Mitros dhe fshatit Simnicë të Gostivarit, punonjësit e firmës që kryente gërmimet kanë hasur në dy fuçi plastike të fshehura nën tokë.
Pas hapjes së tyre, është konstatuar se brenda ndodheshin plumba, karikatorë për armë automatike, mina dhe mjete të tjera shpërthyese. Menjëherë pas raportimit, vendi është siguruar nga policia dhe njësitë e specializuara, ndërsa mjetet e rrezikshme janë konfiskuar për ekspertizë.
Autoritetet kanë nisur hetimet për të zbuluar origjinën e arsenalit dhe qëllimin e fshehjes së tij, duke mos përjashtuar mundësinë e lidhjes me aktivitete kriminale apo të paligjshme. Ky rast ka shkaktuar shqetësim të madh në opinionin publik, duke ngritur pyetje mbi sigurinë dhe kontrollin e armëve në rajon.
