Udhëheqësi ukrainas ka theksuar vazhdimisht se nevojiten garanci të forta sigurie nga partnerët ndërkombëtarë për të siguruar që Rusia të mos e sulmojë përsëri Ukrainën në të ardhmen, nëse arrihet një marrëveshje paqeje.
Me kusht që Kievi t’ia lëshojë të gjithë Donbasin Rusisë, Shtetet e Bashkuara do t’i ofrojnë garanci sigurie Ukrainës, tha sot Presidenti ukrainas Volodymyr Zelensky. Sipas tij, për shkak të luftës midis Shteteve të Bashkuara dhe Izraelit kundër Iranit, Presidenti amerikan Donald Trump po i bën presion Ukrainës që ta përfundojë luftën me Rusinë sa më shpejt të jetë e mundur, raporton Reuters.
“Lindja e Mesme padyshim ka një ndikim tek Presidenti Trump dhe hapat e tij të ardhshëm. Presidenti Trump, për fat të keq, sipas mendimit tim, vazhdon të zgjedhë një strategji për të ushtruar më shumë presion mbi palën ukrainase”, tha Zelensky.
Udhëheqësi ukrainas ka theksuar vazhdimisht se garanci të forta sigurie nga partnerët ndërkombëtarë janë të nevojshme për të siguruar që Rusia të mos e sulmojë përsëri Ukrainën në të ardhmen, nëse arrihet një marrëveshje paqeje.
“Amerikanët janë të gatshëm të finalizojnë këto garanci në një nivel të lartë sapo Ukraina të jetë gati të tërhiqet nga Donbasi”, tha ai.
Ai paralajmëroi se një tërheqje e tillë do të kërcënonte sigurinë si të Ukrainës ashtu edhe, indirekt, të Evropës, pasi do t’i dorëzonte Rusisë pozicione të forta mbrojtëse në rajon.
Shtëpia e Bardhë nuk iu përgjigj menjëherë një kërkese për koment.
Zelensky tha në janar se një dokument mbi garancitë e sigurisë midis Ukrainës dhe Shteteve të Bashkuara ishte “njëqind për qind gati” dhe priste të nënshkruhej.
Pastaj, të martën, pas bisedimeve midis zyrtarëve amerikanë dhe ukrainas në Miami, ai tha se kishte ende punë për t’u bërë.
Rusia ka bërë përparime graduale në fushën e betejës në Ukrainën lindore, raportoi Reuters. Analistët ushtarakë thonë se Rusisë do t’i duheshin disa vite dhe një numër i konsiderueshëm trupash për të pushtuar plotësisht rajonin, i cili përfshin të ashtuquajturin “Rrip Fortesash” të qyteteve dhe qytezave të fortifikuara rëndë.
Zyrtarët ukrainas kanë shprehur më parë frikën se furnizimet me raketa Patriot të SHBA-së – të vetmet të afta për të rrëzuar raketat balistike ruse – mund të thahen për shkak të konfliktit me Iranin.
