Në breg janë gjetur rrobat e tij, telefoni celular dhe një varkë e gomuar – policia, zhytësit dhe ekipet e shpëtimit po kërkojnë në ujë dhe në tokë.
Alarm në Ohër pas zhdukjes së një 32-vjeçari nga Shkupi, i cili dyshohet se është zhdukur në ujërat e Liqenit të Ohrit.
Ngjarja është raportuar mbrëmjen e 14 shtatorit, rreth orës 18:10, në SPB Ohër. Sipas denoncimit të babait të tij, Z.S., 32-vjeçari B.S. kishte qëndruar me të në një kamping në Ohër, ndërsa më pas ishte larguar nga kampi.
Në plazh, pas largimit të tij, janë gjetur disa prej rrobave të 32-vjeçarit, telefoni celular dhe një varkë e gomuar. Këto rrethana kanë ngritur dyshimet se ai mund të ketë hyrë në ujërat e liqenit.
Menjëherë pas denoncimit janë mobilizuar ekipet e policisë liqenore dhe të SPB Ohër. Në operacion janë përfshirë edhe pjesëtarë të shërbimit të shpëtimit malor, si dhe zhytës nga Klubi i Zhytjes “Ohër”.
Kërkimi po zhvillohet në mënyrë intensive si në ujërat e Liqenit të Ohrit, ashtu edhe në tokë.
