Rezultatet e para që Komisioni Shtetëror i Zgjedhjeve i publikoi mëngjesin e sotëm në ueb faqen e tij tregojnë se nga pothuajse 100 për qind e votave të përpunuara, kandidatja e VMRO-DPMNE-së, Gordana Siljanovska Davkova, ka fituar më shumë vota në zgjedhjet e djeshme presidenciale, 362.682 (40,08%) para Stevo Pendarovskit nga LSDM me 180.306 (19,93%).

I treti është Bujar Osmani nga BDI me 120.903 (13.36%), Arben Taravari nga koalicioni Vlen ka 83.356 (9.21%), Maksim Dimitrievski nga ZNAM me 83.787 (9.26%), Biljana Vankovska e mbështetur nga e Majta 41.172 (41%) dhe Stevço Jakimovski nga GROM ka 8103 (0,90%).

Dallimi ndërmjet dy kandidatëve shqiptarë është 37 538 vota në favor të Bujar Osmanit.
Kandidati i Frontit Europian ka fituar në shumicën e komunave shqiptare, derisa Arben Taravari nga VLEN ka fituar në Komunën e Gostivarit dhe të Tearcës.

Rezultatet përfundimtare të zgjedhjeve KSHZ i publikon në afat prej 24 orëve nga dita e përfundimit të tyre.

Për zgjedhjen e presidentit në raundin e parë është e nevojshme që njëri prej kandidatëve të fitojë shumicën e votave nga numri i përgjithshëm i votuesve të regjistruar, pra 907.159 vota. Duke pasur parasysh se askush nuk e ka fituar shumicën e nevojshme, do të organizohet raundi i dytë në të cilin do të jenë dy kandidatët që kanë marrë më shumë vota – Gordana Siljanovska Davkova dhe Stevo Pendarovski.
Raundi i dytë zgjedhor do të mbahet më 8 maj, së bashku me zgjedhjet parlamentare.

Këto janë zgjedhjet e shtata të drejtpërdrejta presidenciale që nga pavarësia e vendit. Të mëparshmet janë mbajtur në vitet 1994, 1999, 2004, 2009, 2014 dhe në 2019