Pajazit Pajaziti, gati 12 vјеt është gjykatës në Gjykatën Penale të Shkupit, ndërkaq emri i tij, ndër vite, disa herë është lakuar dhe përfolur në rrethana të ndryshme. Megjithatë, çështja e arratisjes së ish ushtarit të UÇK-së, Blerim Ramadani, në të cilën ai ishte gjykatës i procedurës paraprake, e ka bërë që të jetë në fokus të opinion.
Pajaziti ishte objekt i hetimit nga Komisioni i Këshillit Gjyqësor, tre anëtarët e të cilit kanë konstatuar gjendjen faktike se si Pajaziti ka vepruar në lëndën e Ramadanit dhe lëndën e ish anëtarit të Këshillit të Prokurorëve Ixhet Memeti dhe gjykatësit suprem Naqe Georgiev.
Në lëndën e Ramadanit, Komisioni nuk ka gjetur arsyet të mjaftueshmë për zëvendësimin e paraburgimit me arrest shtëpiak. Gjithashtu komisioni nuk ka gjetur sqarime për mbikëqyrjen e Ramadanit, i cili u arratis në ditën kur me ankesë të Prokurorisë, Këshilli Penal i Gjykatës, e rrëzoi vendimin e Pajazitit për e paraburgimit.
Komisioni ka konstatuar gjendjen faktike edhe për lëndën e Ixhet Memetit dhe Naqe Georgievit, të cilët, në rrethana të kapjes në flagrancë duke marrë ryshfet për t’i mundësuar lehtësimin e masës së dënimit përmes marrëveshje një trafikanti, ish kryetar i Komunës së Novo Sellës arritën marrëveshje me Prokurorinë që të marrin dënime minimale, ndërkaq këtë marrëveshje e ka pranuar gjykatësi Pajaziti.
Për shembull, Ixhet Memeti ka pranuar fajin se është i përfshirë në skemën e ryshfetit dhe për vepër penale e cila shkon deri në pesë vjet burg është dënuar vetëm me kusht. Nga ana tjetër, gjykatësi Georgiev, vepra e cila i ngarkohet parashikon dënim me burg deri 10 vjet, megjithatë, Pajaziti ka pranuar marrëveshjen që të dënohet vetëm 3 vjet dhe t’i cakton ndalesën e ushtrimit të profesionit.
Pajaziti, ishte aktual edhe në janar të këtij viti pasi, pavarësisht propozimit këmbëngulës të Prokurorisë, ai nuk caktoi paraburgim për Bekim Nezirin dhe 3 të tjerët, të dyshuar për dhunën në M-NAV edhe pse vepra për të cilën dyshoheshin ata në praktikën gjyqësore obligon masa kujdesit të rrepta.
Pajaziti do të mbahet mend edhe për çështjen e Gruevskit, i cili derisa ushtronte detyrën e gjykatësit për zbatimin e sanksioneve, refuzoi ankesën për vuajtje të dënimit me burg prej dy vitesh për lëndën Tanku. Derisa korrierët e kërkonin për t’ia dorëzuar fletë-urdhëresën për të shkuar në burg, Gruevski u arratis në Hungari.
Këshilli Gjyqësor, edhe atëherë formoi Komision për të shqyrtuar veprimin e Pajazitit, por asokohe, Komisioni nuk kishte konstatuar lëshime. /Alsat.mk
