Mbyllja e kanalit për vaditje në të dyja anët e Pollogut, ka nxitur revoltën e bujqve në qytetin e Gostivarit. Ata kërkojnë rikthimin e dy kanaleve për vaditje, sepse siç thonë, tokat do të mbeten të pa punuara. Bujqit protestuan përpara Drejtorisë së Ujërave në Gostivar, nga paralajmëruan vazhdimin e protestave, nëse institucionet përgjegjëse nuk ndërmarrin masa.
“Sot në bujqit e 14 fshatrave nga Gostivari deri në Zherovjan në një gjatësi prej 15 kilometrave, u mblodhëm këtu për të shprehur revoltën tonë për mbylljen e tre të katërtave të kanalit për vaditje të tokave bujqësore, për rreth 3600 hektarë të këtyre fshatrave. Kërkojmë urgjentisht organet të marrin masa dhe ta zbardhin rastin duke e kthyer kanalin në situatën e mëparshme që të mos vijmë në situatë ne bujqit që paguajmë tatime dhe rroga për të punësuar dhe mezi nxjerrim fundin e muajit, që shteti jonë të na shkurtoj të drejtën e jetesës dhe ekzistencës për ne dhe familjet tona”, tha një bujk.
“Toka edhe ashtu nuk punohet si duhet por tash do mbetet e shkretë se uji është kryesor për këtë gjë. Vitin e kaluar nuk morën as një misër nga fusha. S’ka logjikë e gjithë kjo pjesë e shtetit të mbetet pa ushqim. Qind për qind e dëmton tokën kjo, Sharri ka nga një prockë për vaditje, por fshati jonë s’ka pikë uji, Çegrani aspak. Ky është i vetmi kanal që ujit Pollogun e epërm s’ka tjetër”, u shpreh një tjetër bujk.
“Në presim zgjidhje për këtë. Unë personalisht e paraqita rastin në polici, vizituam komunën e Gostivarit dhe kërkuam projektin që të na jepet në shqyrtim, por nuk hasëm në mirëkuptim dhe bashkëpunim dhe u tërhoqëm. Dhe ne si drejtori rajonale vetëm se kemi informuar vazhdimisht drejtorinë që e kemi në Shkup dhe ata kanë ndërmarrë gjitha masat ligjore për të cilat kemi edhe dokumente, që janë drejtuar edhe në MPB, Ministri të bujqësisë, komunë dhe inspektoratin për ujërat e bujqësisë, por kthim informate kemi vetëm që inspektori ka dalë në terren dhe është ngritur lënda, dhe nëse nuk kthehet si ishte procedura do vazhdoj më tutje”, deklaroi Juliana Nikoliq, Drejtoresha e Drejtorisë së Ujërave.
Kërkuam sqarim edhe nga Komuna e Gostivarit, nga ku me shkrim janë përgjigjur se mbulimi i kanalit është bërë për shkak se ka paraqitur rrezik për banorët, u përgjigjën nga Komuna e Gostivarit.
“Ai përbënte një rrezik serioz për jetën dhe shëndetin e banorëve, sidomos për shkak se në të derdheshin ujërat e zeza. Lidhur me këtë problem shumëvjeçar, komuna vazhdimisht ka paraqitur kërkesa për tejkalimin e tij, por për shkak të reagimit të parakohshëm nga ana e autoriteteve, ne si pushtet vendor jemi munduar të plotësojmë nevojat e qytetarëve tanë dhe së paku ta lehtësojmë këtë problem. Me investimin e fundit, Komuna e Gostivarit ndau ujërat e zeza nga ato të dedikuara për ujitje, duke përmirësuar gjendjen në të mirë të qytetarëve dhe fermerëve. Ju sigurojmë se rrjedha e ujit nëpër kanal nuk është ndërprerë”.
Kanali, rrezik për shëndetin e banorëve
Ndamë ujërat e zeza nga ujëra për ujitje
Rrjedha e ujit nuk është ndërprerë
I gjithë problemi ka filluar në shtator kur edhe është paraqitur dëmi, dhe që atëherë rasti është proceduar të organet kompetente. Bujqit kanë paralajmëruar se në rast të mos zgjidhjes së problemit, protesta do të vazhdoj para organeve tjera. /alsat.mk
