Me moton “Me popullin për Evropë” BDI-ja ka vazhduar takimet me qytetarët. Tubimi i radhës, në organizim të Degës së BDI-së Tetovë është mbajtur në Komunën e Bërvenicës. Është diskutuar, sic u tha në tubim, gjendja jo e lakmueshme në vend.
“Këto ëndrra të mos i shohin”. Ky ishte mesazhi i liderit të BDI-së, Ali Ahmeti, gjatë fjalimit të tij në tubimin në Komunën e Bërvenicës, teksa komentonte përpjekjet për të cënuar gjuhën shqipe në Maqedoninë e Veriut.
Sipas Ahmetit, është e turpshme që mediat maqedonase me të madhe shtrojnë pyetjen se Çfarë duan shqiptarët dhe se ky është shteti i Maqedonisë, kurse gjuhë shtetërore është maqedonishtja.
ALI AHMETI – KRYETAR I BDI-së
“Këto ëndrra të mos I shohin pikë së pari. Shqiptarët vet, një dekadë 10 vite, e kanë mbajtë Universitetin e Tetovës, deri në legalizimin në 2004. Kanë tre universitete shqiptarët. Këto ëndrra ato mos I shohin. Prandaj të mos I manipulojnë dhe mos I gënjejnë qytetarët e vet, se kthim prapa nuk ka. Kthim pas nuk ka! Të gjitha të arriturat me gjak I kemi la. Kurkush dhuratë nuk na ka dhënë! Djem nënash kalben, gjak rinie është derdhë. Prandaj çdokush duhet të reflektojë. Ne na duhet paqa, ne na duhet stabiliteti. Ne na duhet siguria. Ne na duhet ekonomia. Ne na duhet anëtarësimi i vendit në Bashkimin Evropian!”
Ndërkohë, BDI-ja vazhdon ta komentojë anketën e fundit, që I nxjerr integristët si forcën e tretë politike në vend.
Sipas BDI-së, me 1% mbështetje, nuk mund të flasësh në emër të popullit shqiptar dhe nuk mund të mbrosh arritjet historike të Marrëveshjes së Paqes të vitit 2001 për barazi.
BDI
Me 1% mbështetje, nuk mund të mbrosh statusin zyrtar të gjuhës shqipe.
Me 1% mbështetje, të detyrojnë të gjesh arsye pozitive edhe për heqjen e balansuesit.
Me 1% mbështetje, ta përdhosin flamurin dhe nuk të lënë as të kërkosh masa ndëshkuese për dhunuesit.
Me 1% mbështetje, gjykatat bëhen instrument i një agjende monoetnike.
Me 1% mbështetje, nuk mund as të përmendësh Bashkimin Evropian.
Me 1% mbështetje, kuadrot dorëhiqen nga institucionet pasi nuk i llogarisin fare.
Me 1% mbështetje, bëhesh vetëm 100% vazal!
Ndryshe, sipas anketës së fundit të realizuar nga Instituti Hulumtues Societas Civilis, Bashkimi Demokratik për Integrim prin bindshëm me përkrahje krahasuar me të gjitha partitë e koalicionin VLEN.
Nga BDI thonë se kjo anketë është dëshmi se kjo qeveri nuk ka legjitimitet dhe kurse mënyra e vetme për dalje nga kriza është mbajtja e zgjedhjeve të parakohshme parlamentare.
