Policia e Tetovës po heton një 62 vjeçar për uzurpim të tokës shtetërore. Bëhet fjalë për uzurpimin e të paktën 3 mijë metrave tokë shtetërore pranë Pishinës së Qytetit në Tetovë. Sipas SPB-së së Tetovës i dyshuari ka ndërtuar edhe një objekt pa leje ndërtimi si dhe ka rrethuar vendin në fjalë.
“Në hapësirën në mes të pishinës së qytetit dhe kontrollit të vjetër teknik, ku është konstatuar se personi Z.K, 62 vjeç nga Tetova, ka kryer uzurpim të tokës shtetërore me sipërfaqe mbi 3000 metra katror ku ka ndërtuar edhe një objekt 15 me 15 dhe të njëjtën tokë e ka rrethuar me rrjetë. Janë marrë gjitha masat dhe pas dokumentimit të rastit, ndaj tij do të paraqitet parashtresë përkatëse”, deklaroi Fatmir Rexhepi, Zëdhënës i SPB Tetovë.
Kreu i Tetovës, Bilall Kasami thotë se pas uzurpimit të tokës qëndron një grup i organizuar, duke përfshi persona nga Gjykata Themelore, ish administrata komunale dhe një gjeodet. Sipas Kasamit, prona është uzurpuar nga dy persona.
“Bëhet fjalë për një keqpërdorim klasik të gjitha pretendimeve që kanë, nuk kanë asnjë marrëveshje me komunën, por edhe pretendimi për këtë hapësirë nuk qëndron se askush nuk e mirëmban dhe nuk është kujdesur për të. Fatkeqësisht ka dyshime për keqpërdorim sepse nga komuna e Tetovës në 2014 kur i është dhënë në diskonim s`ka reaguar askush që ta merr në diskonim”, tha Bilall Kasami, Kryetar i Komunës së Tetovës.
Pas vërtetimit të rastit edhe nga Inspektorati Komunal të dyshuarve iu është dërguar urdhëresë për ta lëshuar hapësirën në fjalë dhe për ta kthyer atë në gjendjen e më parme, por të njëjtit nuk i kanë përfillur vërejtjet juridike të inspektoratit.
Përvetësimi i tokës dhe ndërhyrja me ndërtime është bërë deri sa të pandehurit kanë bërë kërkesë në gjykatë për pronësimin e saj me arsyetimin se e kanë shfrytëzuar për 20 vjet. E njëjta tokë me vendim të Qeverisë i ishte dhënë Komunës së Tetovës në vitin 2014. Që atëherë dhe që pas nisjes së procedurës në gjykatë, ish administrata komunale e Tetovës nuk ka reaguar. Kasami tha se shërbimet e tij juridike janë ankuar në gjykatë dhe kërkojnë që toka të kthehet në pronë të komunës. /Alsat.mk
