Kina, përmes ambasadës së saj në SHBA, i është përgjigjur vendimit të Donald Trump për të vendosur tarifa ndaj produkteve kineze.
Në një postim në llogarinë zyrtare të ambasadës në platformën X mëngjesin e sotëm, Kina fillimisht këshilloi Uashingtonin se “gjëja e duhur do të ishte të konsultohej me Kinën si partnerë të barabartë” dhe më pas paralajmëroi: “Nëse SHBA dëshiron luftë, qoftë ajo një luftë tarifash, një luftë tregtare apo çfarëdo lloj lufte, ne jemi gati të luftojmë deri në fund”.
“Kundërmasat tona për të mbrojtur të drejtat dhe interesat tona janë absolutisht legjitime dhe të nevojshme”, tha në një deklaratë zëdhënësi i ministrisë së Jashtme.
“SHBA-ja, jo dikush tjetër, është përgjegjëse për krizën e fentanilit brenda SHBA-së.”
“Në frymën e humanizmit dhe vullnetit të mirë ndaj popullit amerikan, ne kemi ndërmarrë hapa të fortë për të ndihmuar Shtetet e Bashkuara në adresimin e çështjes”, shtoi ai në deklaratën e tij.
“Në vend që të njohin përpjekjet tona, SHBA-të po përpiqen të shpifin dhe ia hedhin fajin Kinës dhe po kërkojnë të bëjnë presion dhe shantazh ndaj Kinës me rritjen e tarifave. Ata po na dënojnë që i ndihmojmë. Kjo nuk do të zgjidhë problemin e SHBA-së dhe do të dëmtojë dialogun dhe bashkëpunimin tonë në luftën kundër drogës. Bullizmi nuk na tremb. Ngacmimi nuk funksionon me ne. Presioni, shtrëngimi ose kërcënimet nuk janë mënyra e duhur për t’u marrë me Kinën.”
“Kushdo që përdor presionin maksimal ndaj Kinës po zgjedh ‘llojin e gabuar’ dhe bën një llogaritje të gabuar”, përfundoi deklaratën e tij zëdhënësi i ministrisë së Jashtme kineze./vizionplus.tv
