Një ngjarje tragjike ka ndodhur sot në mëngjes në fshatin Sërbjani të Kërçovës, ku një burrë ka sulmuar prindërit e tij me sëpatë, duke i shkaktuar vdekjen babait të tij dhe duke e lënë në gjendje të rëndë nënën.
Sipas informacioneve nga MPB, sot (11.05.2025) rreth orës 07:10, zyrtarët policorë të SPB Kërçovë e kanë arrestuar E.A. (48) nga fshati Sërbjani për veprën penale “vrasje”. Rreth orës 07:00, ai është paraqitur vetë në Ndihmën e Shpejtë në Kërçovë dhe ka deklaruar se i ka sulmuar prindërit në shtëpinë familjare me sëpatë.
Me urgjencë, të dy prindërit janë transportuar në Qendrën Mjekësore të Kërçovës, ku, fatkeqësisht, babai U.A. (74) ka ndërruar jetë si pasojë e plagëve të marra, ndërsa nëna F.A. (67) ndodhet në gjendje kritike dhe pa kontakt.
I dyshuari është arrestuar nga policia, ndërsa pas dokumentimit të plotë të rastit, ndaj tij do të ngrihet kallëzim penal.
