Hetimet ndaj Ekrem Imamoglu kanë përfunduar dhe kërkesa e prokurorisë është përfshirë në aktakuzën zyrtare, e cila tashmë është dorëzuar në Gjykatën Penale. Sipas dokumenteve, prokuroria kërkon dënim me burg nga dy vjet e gjashtë muaj deri në tetë vjet e nëntë muaj për falsifikim të dokumentit zyrtar.
Universiteti i Stambollit anuloi diplomën e Imamoglu më 18 mars 2025, pasi ai u transferua në një universitet në Qipron Veriore pa miratimin e Këshillit të Arsimit të Lartë dhe pa vendim nga Dekanati i Fakultetit të Administrimit të Biznesit të Universitetit të Stambollit.
Imamoglu u arrestua më 19 mars nën akuzat për korrupsion dhe mbështetje të një organizate terroriste, duke shkaktuar protesta masive në mbarë Turqinë, më të mëdhatë në dhjetë vitet e fundit. Arrestimi ndodhi pas publikimit të vendimit për anulimin e diplomës, disa ditë para se Partia Popullore Republikane (CHP) ta shpallte atë kandidat për zgjedhjet presidenciale të ardhshme.
Sipas ligjeve turke, kandidatët presidencialë duhet të kenë diplomë universitare, dhe Imamoglu konsiderohet rival kryesor i presidentit aktual Rexhep Tajip Erdogan. Zgjedhjet presidenciale janë planifikuar për vitin 2028.
Në rast dënimi për ndonjërën nga akuzat, Imamoglu do të humbasë të drejtën për pjesëmarrje në jetën politike.
Presidenti Erdogan, i cili fitoi zgjedhjet e vitit 2023, nuk ka të drejtë ligjore të kandidojë përsëri, përveç nëse zhvillohen zgjedhje të parakohshme dhe nëse merr mbështetjen e tre të pestave të Parlamentit.
