Qytetarët dhe kompanitë nga Maqedonia e Veriut po e zhvendosin kapitalin jashtë vendit: mbi 50 milionë euro janë investuar në pasuri të paluajtshme në Greqi vetëm në pesë vitet e fundit, sipas të dhënave zyrtare të Bankës së Greqisë. Vetëm në vitin 2023, investimet nga Maqedonia kapën vlerën rekord prej 19 milionë eurosh, kryesisht në apartamente buzë detit në rajonin e Selanikut dhe Halkidikit.
Ky trend lidhet drejtpërdrejt me rritjen abuzive të çmimeve të banesave në vend. Në Shkup, një banesë në Qendër sot kushton nga 2.000 deri në 3.500 euro për metër katror, çmime që konkurrojnë tregjet e pasurive të paluajtshme në vendet bregdetare të BE-së. Për krahasim, me rreth 160.000 euro – që është çmimi për një banesë modeste në Shkup – mund të blesh një apartament të njëjtë në Greqi, Mal të Zi apo Kroaci. E ndërsa bregdeti bullgar mbetet më i lirë, me çmime nga 1.000 deri në 1.600 euro për metër, shumë qytetarë po zgjedhin që “parajsën e jetës” ta ndërtojnë jashtë vendit.
Ekspertët paralajmërojnë se ky eksod kapitali është sinjal alarmi për tregun vendas dhe pasojë e një politike urbane të pakontrolluar, ku çmimet rriten ndërsa infrastruktura dhe cilësia e jetesës ngecin në vend. Në sfondin e një krize ekonomike të thelluar dhe pasigurisë afatgjatë, deti duket më afër se sa Qendra e Shkupit.
