Avioni zyrtar i kryeministrit izraelit Benjamin Netanyahu ka kaluar përmes hapësirës ajrore të tre vendeve evropiane, pavarësisht se ndaj tij ekziston një urdhër arresti ndërkombëtar, raportojnë mediat ndërkombëtare. 
Të dhënat e gjurmimit të fluturimeve tregojnë se aeroplani “Wing of Zion”, me të cilin udhëton Netanyahu, ka kaluar mbi Greqi, Itali dhe Francë, të gjitha shtete anëtare të Statutit të Romës – traktatit që krijon Gjykatën Ndërkombëtare Penale (ICC). 
Të tre këto vende janë nënshkruese të Statutit të Romës, që i detyron ligjërisht të bashkëpunojnë me ICC-në dhe të ekzekutojnë urdhër-arreste kur personat e kërkuar për krime luftë, krime kundër njerëzimit ose gjenocid hyjnë në territorin, përfshirë edhe hapësirën ajrore të shtetit të tyre. 
Në nëntor të vitit 2024, Gjykata Ndërkombëtare Penale lëshoi urdhër arresti për Netanyahun për pretendime për krime lufte dhe krime kundër njerëzimit gjatë konfliktit në Gaza. Kjo detyron të gjitha vendet pjesëmarrëse të Statutit të Romës që ta ndalojnë dhe dorëzojnë për gjykim nëse ai hyn në juridiksionin e tyre. 
Avioni i Netanyahut u nis nga Izraeli drejt Shteteve të Bashkuara, dhe pavarësisht urdhrit të arrestit, Greqia, Italia dhe Franca lejuan kalimin e tij mbi hapësirat ajrore të tyre. Kjo ka shkaktuar tension diplomatik, pasi ekspertët e së drejtës ndërkombëtare thonë se këto vende kanë detyrim ligjor të ndalojnë udhëtimin ose të ekzekutojnë urdhrin e ICC-së. 
Ky rast nxjerr në pah tensionet midis detyrave ligjore ndërkombëtare dhe marrëdhënieve diplomatike, ndërsa vendet e përfshira kanë zgjedhur të mos ndërmarrin veprime konkrete edhe pse ekziston një urdhër arresti.
