Reshjet e dendura të shiut që kanë përfshirë rajonin gjatë orëve të fundit kanë shkaktuar probleme serioze në territorin e Komunës së Zhelinës. Sipas njoftimit zyrtar nga Kryetari i Komunës, Blerim Sejdiu, disa lumenj kanë dalë nga shtretërit e tyre, duke shkaktuar dëme materiale.
Dëmet në infrastrukturë dhe pronat private
Përveç vërshimeve, situata është rënduar edhe nga erozioni i tokës, i cili ka dëmtuar dukshëm infrastrukturën rrugore në disa zona. Nga terreni raportohet për dëme në prona private, ndërsa pamjet tregojnë rrëshqitje të dheut në afërsi të zonave të banuara.
Kryetari Sejdiu ka bërë të ditur se ekipet komunale ndodhen në terren që nga orët e hershme të mëngjesit për të sanuar dëmet dhe për t’u ardhur në ndihmë qytetarëve të prekur.
> “Ekipet tona janë në terren duke intervenuar dhe ndihmuar qytetarët tanë. Jemi duke e përcjellë situatën nga afër dhe gjendja në përgjithësi është stabile në këto momente,” u shpreh Sejdiu në njoftimin e tij.
Autoritetet komunale falënderojnë banorët për durimin e treguar dhe sigurojnë se monitorimi do të vazhdojë deri në normalizimin e plotë të situatës. Deri më tani, nuk raportohet për të lënduar në njerëz, por vetëm për dëme materiale që pritet të vlerësohen në ditët në vijim.
