Debati mbi draft-ligjin e ri për Arsimin e Lartë në Universitetin e Tetovës është përcjellë me kritika të ashpra nga stafi akademik. Profesori i UT-së, Arianit Reka, ka adresuar drejtpërdrejt Ministren e Arsimit, duke e cilësuar qasjen aktuale si arrogante dhe diskriminuese ndaj universiteteve shqiptare.
Sipas Prof. Rekas, heshtja përballë këtyre ndryshimeve ligjore nuk është opsion, pasi ky ligj nuk zgjidh problemet, por krijon barriera të reja institucionale.
7 Pikat e “Nxehta” të Kundërshtimit:
Diplomat në Gjuhën Shqipe: Reka kërkoi që gjuha shqipe në diploma të jetë detyrim ligjor dhe jo vullnet i statutit të universiteteve. Ai rikujtoi se mungesa e këtij rregullimi ligjor ka bërë që asnjë shqiptar në UKIM apo universitete tjera të mos marrë diplomë në gjuhën amtare.
Cënimi i Autonomisë: Ligji parashikon që Ministria të aprovojë planet financiare të universiteteve, gjë që sipas tij është centralizim politik dhe kontroll i drejtpërdrejtë mbi pavarësinë e lartë arsimore.
Diskriminimi i UT-së dhe UNT-së: Edhe pse UT ka mbi 60% të stafit me thirrje profesoriale, ligji i ri pengon hapjen e ciklit të tretë (doktoratës).
Ndarja Skandaloze e Buxhetit: U denoncua fakti se në vitin 2025, nga 5 milionë euro investime në shkencë, UT mori vetëm 2.5%, ndërsa UNT zero.
Veshja dhe Besimi: Profesori paralajmëroi se formulimet e paqarta në ligj hapin derën për diskriminim mbi bazën e bindjeve dhe besimit.
Harresa e Asistentëve: Kritikë e ashpër u drejtua edhe për mungesën e zgjidhjes për asistentët që punojnë me orar të pjesshëm për mbi një dekadë.
Digjitalizimi: U kërkua “Pasaporta Digjitale Akademike” për të lehtësuar mobilitetin e studentëve dhe për të zhdukur burokracinë.
”Ky nuk është ligj reformues; kjo është arrogancë dhe padrejtësi e paketuar si ligj. Le të shohim kush do ta ketë fjalën e fundit: arroganca apo e drejta,” përfundoi Prof. Reka.
Debati mbetet i hapur, ndërsa thirrja për reflektim “pa përjashtime” u është drejtuar të gjithë aktorëve politikë dhe akademikë në vend.
