Pas një muaji heshtjeje, grupi jemenas hyn në konflikt duke kërcënuar edhe rrugët kryesore të tregtisë globale
Pas katër javësh pa ndërhyrje direkte, Huthit në Jemen kanë rifilluar sulmet ndaj Izraelit, duke lëshuar raketa dhe duke sinjalizuar një fazë të re të përshkallëzimit në konfliktin rajonal.
Grupi, i cili kontrollon kryeqytetin Sana’a dhe pjesë të mëdha të veriut të Jemenit, deklaroi se ka shënjestruar “objektiva të ndjeshme ushtarake izraelite”. Ky veprim shënon hyrjen e tyre të drejtpërdrejtë në konfliktin aktual mes SHBA-së, Izraelit dhe Iranit.
Megjithatë, ndikimi i drejtpërdrejtë ushtarak i Huthive ndaj Izraelit konsiderohet më i kufizuar krahasuar me kapacitetet e Iranit. Edhe në të kaluarën, pas sulmeve të Hamasit në tetor 2023, Huthit ndërmorën disa sulme me raketa drejt Izraelit, por me efekt të kufizuar në terren.
Rreziku më i madh që paraqet grupi lidhet me pozicionin e tij strategjik në brigjet e Jemenit. Në të kaluarën, Huthit kanë sulmuar anije tregtare në ngushticën Bab al-Mandab, një korridor kyç që lidh Detin e Kuq me Oqeanin Indian. Çdo ndërprerje e këtij kalimi do të kishte ndikim të drejtpërdrejtë në tregtinë globale dhe furnizimet me energji.
Një përshkallëzim i tillë, i kombinuar me tensionet në ngushticën e Hormuzit, ku Irani ka kufizuar lëvizjen, mund të vërë në rrezik dy nga rrugët më të rëndësishme detare në botë.
Përveç kësaj, Huthit kanë kapacitet për të goditur infrastrukturë energjetike dhe ushtarake në vendet fqinje të Gjirit, si Arabia Saudite dhe Emiratet e Bashkuara Arabe, siç kanë bërë edhe në të kaluarën.
Në rastet e mëparshme, sulme të tilla kanë sjellë reagime të forta ushtarake nga SHBA dhe Izraeli, të cilat kanë goditur objektiva të lidhura me udhëheqjen dhe kapacitetet ushtarake të grupit. Megjithatë, Huthit kanë arritur të ruajnë strukturën dhe aftësinë e tyre operacionale.
Një faktor tjetër është dinamika e brendshme në Jemen, ku situata kishte hyrë në një fazë relative stabiliteti pas viteve të konfliktit. Një përfshirje më e thellë e Huthive në luftën rajonale mund të rrezikojë rikthimin e tensioneve të brendshme.
Zhvillimet e fundit ngrenë pikëpyetje mbi shkallën e përfshirjes së Huthive në ditët në vijim. Nëse sulmet vazhdojnë dhe intensifikohen, ato pritet të shënojnë një zgjerim të mëtejshëm të konfliktit në Lindjen e Mesme. /Përshtatur nga BBC
