Në një operacion të gjerë policor, Sektori i Punëve të Brendshme -Tetovë ka arritur të zbardhë 17 vepra penale të lidhura me prodhimin dhe tregtimin e paautorizuar të narkotikëve, substancave psikotrope dhe prekursorëve, në rajonin e Tetovës dhe Gostivarit. Operacioni ka zgjatur dy muaj, janar dhe shkurt, dhe ka rezultuar me arrestimin e 18 personave, 11 nga Tetova dhe 7 nga Gostivari, të cilët kanë qenë pjesë e një rrjeti të organizuar kriminal.
Nëpërmjet kërkimeve dhe kontrollimeve të kryera, policia ka gjetur dhe konfiskuar më shumë se 3 kilogramë lëndë narkotike, përfshirë marijuanë, kokainë, përzierje marijuanë me duhan dhe bimë të “kanabisit”. Këto lëndë janë sekuestruar si provë materiale dhe do të dërgohen për analizë kimike. Të gjithë autorët e veprave penale janë paraqitur në Prokurori me kallëzim penal, sipas nenit 215 të Kodit Penal.
Policia ka përgatitur edhe 12 kërkesa për inicimin e procedurës kundërvajtëse ndaj 15 personave, të cilët janë dyshuar për përdorim të narkotikëve. Gjithsej 38 persona (22 nga Tetova dhe 16 nga Gostivari) janë privuar nga liria për shkak të përfshirjes në këto vepra penale apo kundërvajtje.
Në kuadër të aksioneve për Siguri në Komunikacionin Rrugor, policia ka identifikuar 1537 shkelje të ndryshme të trafikut, ose 218 më pak se në të njëjtën periudhë të vitit 2023. Për shkak të këtyre shkeljeve, janë përjashtuar nga qarkullimi 58 automjete dhe 205 drejtues mjetesh, të cilët kanë kryer veprime të ndaluara, si të drejtuarit pa patentë shoferi, nën ndikimin e alkoolit, me defekte teknike ose me skadim të regjistrimit. Policija ka konfiskuar përkohësisht edhe 109 patenta shoferi dhe 41 leje qarkullimi në komunikacion. Gjithashtu, janë marrë 177 automjete të parkuara ilegalisht. Policija ka shqiptuar 592 masa për shpejtësi të papërshtatshme sipas kushteve të rrugës, pra për tejkalim shpejtësie brenda dhe jashtë zonave të banuara.
Sektori i Punëve të Brendshme -Tetovë bën të ditur se do të vazhdojë me angazhimin e tij për parandalimin dhe luftimin e kriminalitetit, sidomos atij të lidhur me narkotikët, si dhe për rritjen e sigurisë në komunikacionin rrugor. /tvklan.mk
