Policia publikoi detaje për aksidentin tragjik rrugor në të cilin një maturant humbi jetën të premten rreth orës 02:15 të mëngjesit pranë Jastrebarskos.
Sipas informacioneve zyrtare, aksidenti ndodhi në fshatin Gornja Reka. Automjeti drejtohej nga një 19-vjeçar nën ndikimin e alkoolit, me 1.24 promil alkool të matur në gjak.
Në veturë ndodheshin edhe tre pasagjerë, gjithashtu 19-vjeçarë, të cilët në momentin e përplasjes nuk kishin vendosur rripat e sigurimit, shkruan portali Danica.hr.
Sipas policisë:
“Gjatë hyrjes në një kthesë të majtë, shoferi nuk e përshtati shpejtësinë me kushtet dhe karakteristikat e rrugës, humbi kontrollin mbi automjetin dhe doli nga rruga në një kanal, ku u përplas me një shtyllë betoni. Nga goditja e fortë, automjeti u hodh mbi argjinaturën e kanalit.”
Si pasojë e përplasjes së fuqishme, një nga pasagjerët 19-vjeçarë humbi jetën në vendngjarje.
Një tjetër pasagjer pësoi lëndime të rënda trupore dhe u transportua me urgjencë për trajtim në Qendrën Klinike Spitalore në Zagreb.
Policia njoftoi të shtunën se shoferi dhe një pasagjere tjetër femër pësuan lëndime më të lehta.
Pas përfundimit të hetimeve në vendngjarje, ndaj shoferit të ri është ngritur kallëzim penal dhe ai tashmë është dorëzuar në paraburgim.
Për shkak të rëndësisë së veprës dhe pasojave fatale të aksidentit, 19-vjeçari përballet me një dënim me burg deri në 15 vjet në procedurën e mëtejshme gjyqësore.
