Tetova do të jetë mikpritëse e një prej ngjarjeve më të veçanta kulturore të këtij viti, pasi Panairi Amerikan do të organizohet në qytet në kuadër të festimeve Freedom 250, që shënojnë 250-vjetorin e Shteteve të Bashkuara të Amerikës, përcjell tetova1
Ngjarja do të mbahet më 20 qershor, në parkun e madh të Universitetit të Tetovës, duke filluar nga ora 17:00 deri në 22:00. Organizatorët premtojnë një mbrëmje plot argëtim dhe aktivitete për të gjitha moshat, duke sjellë në Maqedoninë e Veriut atmosferën karakteristike të panaireve tradicionale amerikane.
Vizitorët do të kenë mundësi të shijojnë muzikë live, aktivitete interaktive, sfida sportive, lojëra, përvoja edukative dhe ushqime tipike amerikane. Mes atraksioneve të veçanta do të jenë rodeo mekanike, këndi për fotografi me tematikë kaubojësh, si dhe degustimi i corn dog, një nga ushqimet më të njohura të panaireve në SHBA.
Panairi do të promovojë gjithashtu inovacionin, kulturën, arsimin dhe angazhimin qytetar amerikan, përmes aktiviteteve të organizuara nga American Corners, EducationUSA, alumni të programeve të shkëmbimit dhe partnerë lokalë.
Programi artistik do të jetë i pasur, me performanca të DJ-ve, muzikë country, grupe rock dhe artistë të ndryshëm, ndërsa një nga pikat kulmore të mbrëmjes do të jetë koncerti i Bandës Ushtarake Amerikane “Free Groove”.
Organizatorët ftojnë të gjithë qytetarët që të bëhen pjesë e kësaj ngjarjeje unike, qoftë për të njohur më nga afër kulturën amerikane apo për të kaluar një mbrëmje të këndshme me familjen dhe miqtë.
Njoftimi i plotë:
“Panairi Amerikan vjen në Tetovë për festuar 250-vjetorin e SHBA-ve.
Bëhuni gati të përjetoni atmosferën amerikane si kurrë më parë! Panairi Amerikan vjen në Tetovë, duke sjellë një nga traditat më të dashura amerikane në Maqedoninë e Veriut, si pjesë e festimeve Freedom 250 që shënojnë 250-vjetorin e Shteteve të Bashkuara të Amerikës.
Ngjarja do të zhvillohet në parkun e madh të Universitetit të Tetovës, më 20 qershor duke filluar nga ora 17:00 dhe duke vazhduar deri në orën 22:00. Vizitorët e të gjitha moshave do të mund të shijojnë një mbrëmje plot argëtim me muzikë live, aktivitete interaktive, sfida sportive, mundësi edukative, lojëra, ushqim amerikan dhe përvoja praktike të frymëzuara nga atmosfera e panaireve tradicionale shtetërore amerikane. Nëse jeni adhurues të aventurës, provoni aftësitë tuaja në një rodeo mekanike, bëni fotografi në një ambient me tematikë kaubojësh ose shijoni një corn dog, një nga ushqimet më ikonike të panaireve në Shtetet e Bashkuara.
Ngjarja do të prezantojë inovacionin, kulturën, arsimin dhe angazhimin qytetar amerikan përmes aktiviteteve të organizuara nga American Corners, EducationUSA, alumni të programeve të shkëmbimit dhe partnerë lokalë. Gjatë gjithë mbrëmjes, vizitorët do të mund të shijojnë një program të larmishëm argëtues me DJ, muzikë country, grupe rock dhe artistë të tjerë, përfshirë edhe një koncert energjik nga Banda Ushtarake Amerikane Free Groove.
Nëse jeni kuriozë të njihni më mirë kulturën amerikane ose thjesht dëshironi të kaloni një ditë të veçantë dhe të paharrueshme me familjen dhe miqtë, Panairi Amerikan Shtetëror premton diçka për secilin.
Hyrja është falas dhe të gjithë janë të mirëpritur”, thuhet në njoftim./tetova1.mk
