Libani nuk është informuar për marrëveshjen midis Shteteve të Bashkuara dhe Iranit, e cila parashikon përfundimin e luftës në të gjitha frontet në Lindjen e Mesme, përfshirë atë midis Hezbollahut dhe Izraelit, tha një burim zyrtar libanez për AFP-në.
“Nuk jemi informuar për kushtet e marrëveshjes” dhe as për kohën kur do të hyjë në fuqi armëpushimi në luftën midis organizatës shiite Hezbollah dhe Libanit, tha ky burim zyrtar i cili kërkoi të mbetej anonim.
Megjithatë, armiqësitë në pjesën jugore të vendit kanë rënë në intensitet dhe agjencia zyrtare e lajmeve ANI e Libanit raportoi se nuk pati sulme izraelite këtë mëngjes.
Nga ana e saj, Hezbollahu nuk ka marrë përgjegjësi për sulmet kundër Izraelit që nga nata e së dielës.
Në një deklaratë, kryetari i parlamentit libanez, Nabih Berri, përshëndeti “Iranin dhe SHBA-në” dhe falënderoi të dy vendet për “këmbënguljen në përfshirjen në marrëveshje të një kushti të domosdoshëm dhe detyrues që parashikon përfundimin e sulmit izraelit kundër të gjithë Libanit”.
Marrëveshja SHBA-Iran parashikon “përfundimin e menjëhershëm dhe përfundimtar të luftës dhe operacioneve ushtarake në fronte të ndryshme, përfshirë Libanin”, tha zëvendësministri i Jashtëm iranian, Kazem Gharibabadi.
Nga ana e tij, Ministri i Mbrojtjes i Izraelit, Israel Katz, theksoi se vendi do të mbajë trupat e tij në Liban, Siri dhe Gaza.
“Unë dhe kryeministri Benjamin Netanyahu po ndjekim një politikë të qartë sipas së cilës ushtria izraelite do të mbetet në zonat e sigurisë në Liban, Siri dhe Gaza për një kohë të pacaktuar për të mbrojtur kufijtë dhe komunitetet izraelite nga elementët xhihadistë”, tha Yisrael Katz në një deklaratë.
Katz paralajmëroi gjithashtu Iranin se Izraeli do të hakmerrej me “forcë të plotë” nëse Republika Islamike e sulmon atë në përgjigje të operacioneve të saj ushtarake në Liban.
Ndërkohë, autoritetet në Libanin jugor u kanë bërë thirrje personave të zhvendosur që të mos kthehen ende në shtëpitë e tyre.
Ushtria izraelite ka javë të tëra që po shkatërron fshatrat në Libanin jugor, duke thënë se po vepron kundër luftëtarëve të Hezbollahut që fshihen në zonat ku jetojnë civilë.
