Kryeministri i Izraelit, Benjamin Netanyahu, ka ritheksuar se ushtria izraelite nuk do t’i japë fund pranisë së saj ushtarake në Libanin jugor, duke argumentuar se kjo është e nevojshme për garantimin e sigurisë së qytetarëve izraelitë pranë kufirit verior.
Në një postim në rrjetin social X, Netanyahu tha se udhëzimet e tij për ushtrinë, të koordinuara me ministrin e Mbrojtjes, Israel Katz, mbeten të pandryshuara.
“Luftëtarët tanë në Libanin jugor kanë liri të plotë veprimi për të penguar çdo kërcënim të drejtpërdrejtë ose të ri ndaj tyre apo ndaj banorëve të veriut. IDF nuk ka kufizime në këtë drejtim”,deklaroi Netanyahu.
Ai shtoi se Izraeli do të vazhdojë të qëndrojë në atë që e cilësoi si “zonë sigurie” në Libanin jugor për aq kohë sa do të konsiderohet e nevojshme për mbrojtjen e qytetarëve izraelitë.
Nga ana tjetër, ministri i Jashtëm izraelit, Gideon Saar, deklaroi se Izraeli nuk ka “ambicie territoriale” në Liban, pavarësisht vazhdimit të pranisë ushtarake në zonën kufitare.
Ndërkohë, Forcat e Mbrojtjes së Izraelit (IDF) njoftuan heqjen e kufizimeve të sigurisë në tetë komunitete izraelite pranë kufirit me Libanin. Sipas një njoftimi në Telegram, masat u hoqën në zonat Safsufa, Meron, Or HaGanuz, Bar Yochai, Yesud HaMaala, Kisra-Sumei, Beit Jann dhe Sde Eliezer.
Zhvillimet vijnë në një kohë kur armëpushimi në Liban po respektohet në masë të madhe. Një zyrtar i lartë i sigurisë libaneze i tha agjencisë Reuters se zbatimi i marrëveshjes ka qenë “pothuajse i plotë” që nga mbrëmja e së shtunës.
Edhe zëvendëspresidenti amerikan, JD Vance, komentoi situatën, duke e cilësuar procesin në Liban si “një punë në zhvillim” dhe duke theksuar se diskutimet diplomatike do të vazhdojnë.
