A mund të ketë shumë shpejt zgjedhje të jashtëzakonshme për Këshillin Komunal të Tetovës, më pak se një vit pas zgjedhjeve të tetorit të kaluar? Dhe, a po mendon pushteti lokal në Tetovë për një përballje të re zgjedhore?
Vendimi i Gjykatës Kushtetuese, i marrë para pak ditësh, me të cilin u shfuqizua Vendimi për ndryshimin e emrave të rrugëve, shesheve, urave dhe objekteve të tjera infrastrukturore në Tetovë nga viti 2007, ka rritur tensionet në kampin politik shqiptar.
Një ditë pas vendimit të Gjykatës Kushtetuese, BDI kërkoi mbajtjen e një seance të jashtëzakonshme të Këshillit Komunal, ku, sipas tyre, edhe pa mekanizmin e Badenterit, mund të votohej sërish vendimi për emrat e rinj të rrugëve.
“Fokus” mëson se pikërisht kjo kërkesë e BDI-së për një seancë të jashtëzakonshme e ka shtyrë kryetarin e Komunës së Tetovës dhe një nga drejtuesit e VLEN-it, Bilall Kasamin, të mendojë seriozisht ta pranojë këtë sfidë dhe në këtë mënyrë të shkaktojë shpërndarjen e Këshillit Komunal.
Sipas burimeve jozyrtare, këtij skenari i shkon në favor edhe rezultati i sondazheve të fundit të opinionit publik, ku epërsia e pushtetit lokal është dyfishuar krahasuar me zgjedhjet lokale të vjeshtës së kaluar. Nëse lista këshilltare e VLEN-it në zgjedhjet e fundit fitoi rreth dy mijë vota më shumë se ajo e BDI-së, tani sondazhet tregojnë një diferencë prej 4–5 mijë votash, që do të përkthehej edhe në një raport më të favorshëm këshilltarësh sesa ai aktual prej 14 me 12 në favor të pushtetit.
Bazën ligjore për një veprim të tillë – votimin sërish të të njëjtit vendim dhe shpërndarjen e Këshillit – Kasami e gjen në nenin 75 të Ligjit për Vetëqeverisje Lokale. Në pikën e parë të paragrafit të parë thuhet shprehimisht se: “Këshilli shpërndahet nëse e miraton përsëri aktin që më parë është shfuqizuar ose anuluar me vendim të Gjykatës Kushtetuese.”
Sipas informacioneve të “Fokus”, ideja e pushtetit është të mos lejojë që vendimi i Gjykatës Kushtetuese të përdoret politikisht. Me fjalë të tjera, argumentet për këtë çështje të përballen në zgjedhje dhe qytetarët të vendosin kujt do t’ia japin besimin.
Paralelisht me përplasjet politike, prej kohësh është formuar një komision komunal që duhet ta zgjidhë në mënyrë sistematike çështjen e emërtimit të rrugëve. Nuk bëhet fjalë vetëm për emrat e kontestuar dhe të shfuqizuar nga Gjykata Kushtetuese, por edhe për dhjetëra rrugë, ura dhe objekte të tjera infrastrukturore që ende identifikohen vetëm me numra.
Për këtë çështje foli edhe kryeministri Hristijan Mickoski, i cili deklaroi se vendimi i Gjykatës Kushtetuese nuk është fundi i procesit.
“Mendoj se ky është fillimi i një procesi që duhet të përfundojë me një vendim. Me Bilall Kasamin kemi biseduar që rrugët e numëruara ose pa emër të marrin emra të njerëzve që kanë merita për Maqedoninë si shtet i pavarur. Unë e mbështes këtë, sepse është më mirë që rrugët të mos kenë numra, por të mbajnë emrat e personaliteteve të merituara për shtetin e pavarur të Maqedonisë,” deklaroi Mickoski para tre ditësh.
Fjalët e tij i konfirmoi edhe kryetari i Komisionit për emërtimin e rrugëve, Albi Qamili, i cili është edhe zëvendëskryetar i Komunës së Tetovës. Sipas tij, BDI-ja dhe pushteti i kaluar lanë pas zgjidhje të papërfunduara, ndërsa pushteti aktual po punon intensivisht për përfundimin e procesit.
“Edhe një herë duam ta informojmë qartë opinionin se bëhet fjalë për një aksion të koordinuar dhe një skenar në relacionin BDI – Gjykata Kushtetuese, me qëllim që të largohet vëmendja e publikut pikërisht në momentin kur Komuna e Tetovës po e finalizon procesin e emërtimit të rrugëve. Bëhet fjalë për një vendim që asnjëherë nuk është zbatuar në praktikë,” tha Albi Qamili.
Vendimi i ri, ndryshe nga ai i vitit 2007, para se të votohet në Këshillin Komunal të Tetovës, do t’i dërgohet për miratim Qeverisë, e më pas, me vendim formal të Këshillit, do të hyjë në fuqi.
