Katër persona u vranë dhe shtatë të tjerë u plagosën nga sulmet ruse gjatë natës në Ukrainë, njoftuan të shtunën zyrtarë ukrainas, transmeton Anadolu.
Në rajonin e Dnipropetrovskut, Rusia goditi një ndërmarrje industriale në Kamianske, ku u vranë katër persona dhe u plagosën pesë të tjerë, tha guvernatori Oleksandr Hanzha në Telegram.
Në rajonin e Kievit, dy persona u plagosën në një sulm në Boryspil, tha guvernatori Timur Tkachenko në Telegram.
Tkachenko tha se po vijojnë përpjekjet për të vlerësuar dhe trajtuar pasojat e sulmit ndaj një ndërtese banimi nëntëkatëshe.
Forcat Ajrore të Ukrainës njoftuan në Telegram se gjatë natës u rrëzuan 128 dronë rusë.
Ndërkaq, Ministria e Mbrojtjes e Rusisë tha se forcat e saj goditën dy nga furnizuesit më të mëdhenj të produkteve metalike për ushtrinë ukrainase në rajonin e Dnipropetrovskut.
Ministria tha se forcat ruse goditën gjithashtu qendra logjistike, një anije mallrash të thata, dy objekte për magazinimin dhe shpërndarjen e karburanteve, si dhe qendra të zbulimit elektronik në rajonet Mykolaiv, Odesa dhe Kiev.
