Sllovenia ka paralajmëruar një reformë të madhe në sistemin arsimor pas publikimit të rezultateve të PISA 2025, sipas të cilave nxënësit kanë shënuar rezultatet më të dobëta që nga fillimi i këtij vlerësimi, përcjell tetova1
Ministri slloven i Arsimit, Shkencës dhe Rinisë, Borut Ronçeviç, ka njoftuar heqjen e arsimit fillor nëntëvjeçar dhe futjen graduale të një modeli të riformuar të arsimit tetëvjeçar, duke filluar nga viti shkollor 2028/2029.
“Gjendja është shumë e keqe, ndërsa trendi është katastrofik”, ka vlerësuar Ronçeviç, raportojnë mediat sllovene.
Reforma parashikon edhe kritere më të larta në vlerësim, forcimin e etikës së punës, lehtësimin e programeve mësimore me më shumë fokus te kuptimi i materialit, si dhe mbështetje shtesë për nxënësit e talentuar.
Rezultatet e PISA 2025 tregojnë se nxënësit sllovenë në matematikë dhe lexim kanë rënë nën mesataren e vendeve të OECD-së, ndërsa rezultatet në shkencat natyrore janë rreth mesatares.
Në matematikë, nivelin bazë të njohurive e kanë arritur 65 për qind e nxënësve, ndërsa në lexim 64 për qind. Për krahasim, mesatarja e OECD-së është 69 për qind.
Si faktorë që kanë ndikuar në këtë trend negativ përmenden përdorimi i tepruar i pajisjeve digjitale, ndërprerjet e procesit mësimor dhe ulja e përqendrimit të nxënësve. Sipas të dhënave, 48 për qind e nxënësve përdorin mjete me inteligjencë artificiale për përgatitjen e detyrave shkollore.
Problem tjetër është mungesa e kuadrit mësimor. Vetëm 17,5 për qind e nxënësve ndjekin mësimin në shkolla, drejtorët e të cilave nuk e konsiderojnë mungesën e mësuesve si pengesë në funksionimin e tyre.
Nga Sindikata e Arsimit, Shkencës dhe Kulturës së Sllovenisë kanë vlerësuar se rezultatet e dobëta janë pasojë e neglizhencës shumëvjeçare dhe investimeve të pamjaftueshme sistematike në stafin arsimor./tetova1.mk
