Benjamin Netanyahu dhe bashkëshortja e tij, Sara, kanë shpenzuar afro 470 mijë dollarë për grim, parukeri dhe shpenzime të tjera të mbuluara nga shteti izraelit gjatë viteve të fundit.
Kryeministri izraelit Benjamin Netanyahu dhe bashkëshortja e tij, Sara, kanë shpenzuar afro 470 mijë dollarë për shërbime parukerie, grimi dhe shpenzime të tjera të mbuluara nga shteti, nga viti 2019 deri në gusht 2026.
Të dhënat janë publikuar nga Zyra e Kryeministrit të Izraelit pas një kërkese të paraqitur në dhjetor 2025 nga avokatja Yaara Winkler-Shalit, në bazë të ligjit për lirinë e informacionit.
Sipas dokumenteve, Netanyahu dhe bashkëshortja e tij përbëjnë rreth 90% të shpenzimeve për grim dhe parukeri.
Vetëm nga shtatori deri në nëntor 2023, shteti pagoi afro 2.600 dollarë për parukerinë e Netanyahut dhe 1.580 dollarë për grim. Në tetor 2023, 810 dollarë u shpenzuan vetëm për flokët e kryeministrit.
Shpenzimet arritën nivelin më të lartë në vitin 2025, me rreth 111 mijë dollarë. Një pjesë e konsiderueshme lidhej me udhëtimet jashtë vendit. Gjatë një vizite në Uashington në shkurt 2025 u shpenzuan 13.500 dollarë për grim dhe parukeri, ndërsa një udhëtim në Uashington në korrik 2024 kushtoi 11.500 dollarë për të njëjtat shërbime.
Dokumentet tregojnë gjithashtu 134 mijë dollarë shpenzime të tjera të lidhura me Netanyahun, ndërsa për Naftali Bennett shifra ishte 19 mijë dollarë dhe për Yair Lapid 2.600 dollarë.
Në disa prej dokumenteve janë fshehur emrat e parukierëve dhe grimierëve personalë të Netanyahut për arsye të cilësuara si “siguri shtetërore”. Autoritetet nuk publikuan gjithashtu të dhëna për bizhuteri, veshje apo shërbime këshillimi për imazhin.
