Jared Kushner ka reaguar ndaj raportimeve të publikuara së fundmi në disa media amerikane lidhur me investimin e planifikuar në Zvërnec, duke dhënë versionin e tij për mënyrën e sigurimit të pronës, ndikimin në mjedis dhe përmasat që mund të marrë projekti.
Në sqarimin e tij, Kushner kundërshton pretendimet se toka ku parashikohet zhvillimi i projektit është dhënë falas nga qeveria shqiptare. Sipas tij, prona është siguruar nëpërmjet një marrëveshjeje private dhe në përputhje me legjislacionin shqiptar.
Ai pretendon se vlera e transaksionit arrin në rreth 230 milionë euro, shumë që, sipas tij, e bën marrëveshjen një prej transaksioneve më të kushtueshme të këtij lloji në rajon.
Një pjesë të rëndësishme të reagimit, Kushner ia kushton shqetësimeve që janë ngritur për ndikimin e investimit në natyrën e Zvërnecit.
Ai garanton se projekti synon të zbatojë standarde të larta mjedisore dhe argumenton se zhvillimi nuk do të vijë në kurriz të pasurive natyrore të zonës. Përkundrazi, sipas tij, objektivi është që territori pas realizimit të investimit të ketë më shumë gjelbërim dhe biodiversitet.
Kushner shprehet gjithashtu se është personalisht i angazhuar në projekt dhe se synimi është krijimi i një destinacioni të veçantë, duke kombinuar zhvillimin turistik me mbrojtjen e mjedisit.Në reagimin e tij nuk mungojnë as vlerësimet për Shqipërinë. Ai shprehet optimist për potencialin turistik dhe ekonomik të vendit dhe e konsideron investimin në Zvërnec si një angazhim me perspektivë afatgjatë.
Sipas shifrave të bëra publike prej tij, nëse projekti zhvillohet plotësisht dhe rezulton i suksesshëm, investimi total mund të arrijë deri në rreth 4 miliardë euro.
Kushner argumenton se një projekt i këtyre përmasave mund të sjellë vende të reja pune, të rrisë aktivitetin ekonomik dhe të krijojë mundësi të tjera zhvillimi për Shqipërinë.
Me këtë reagim, ai synon t’u përgjigjet drejtpërdrejt kritikave dhe pikëpyetjeve të ngritura në SHBA dhe Shqipëri, duke këmbëngulur se projekti do të ndërtohet mbi një investim privat dhe me synimin, sipas tij, për të ruajtur vlerat natyrore të Zvërnecit.
