Policia turke ka arrestuar 18 punonjës të Bashkisë së Stambollit pas lëshimit të 22 urdhërarresteve në kuadër të një hetimi për ryshfet dhe korrupsion. Kjo lëvizje konsiderohet si një zgjerim i goditjes së autoriteteve kundër opozitës dhe ndaj kryebashkiakut të Stambollit, Ekrem Imamoglu, i cili ndodhet në paraburgim që nga muaji mars.
Imamoglu, një nga kundërshtarët më të fortë politikë të Presidentit Rexhep Tajip Erdogan, po përballet me akuza për korrupsion që ai i ka cilësuar si të motivuara politikisht. Arrestimi i tij ka shkaktuar protesta masive në të gjithë vendin, që vlerësohen si më të mëdhatë në dekadën e fundit në Turqi.
