Bashkimi Evropian shpreh shqetësim të thellë për thellimin e bashkëpunimit ushtarak midis Serbisë dhe Kinës, pas njoftimit për stërvitjen e përbashkët ushtarake “Paqeruajtësit 2025”, që do të zhvillohet në provincën Hebei në fund të korrikut.
Zëdhënësi i BE-së i bëri thirrje Beogradit të respektojë politikën e jashtme të bllokut dhe të heqë dorë nga veprimet dhe deklaratat që bien ndesh me interesat dhe qëndrimet evropiane. “Ne kërkojmë nga Serbia të na bindë për drejtimin e saj strategjik si partner i besueshëm evropian, bazuar në parimet dhe vlerat e përbashkëta,” u shpreh ai.
Megjithëse Serbia mban një pozicion ushtarak neutral dhe është pjesë e Partneritetit për Paqe të NATO-s, bashkëpunimi me Kinën në fushën ushtarake dhe përdorimi i armëve kineze përbën një sinjal shqetësues për stabilitetin rajonal dhe orientimin e Beogradit drejt BE-së.
Kjo është hera e parë që forcat speciale serbe dhe kineze organizojnë një stërvitje të përbashkët, duke nxitur dyshime për qëllimet e Serbisë në skenën ndërkombëtare dhe për pasojat që mund të ketë kjo në raportet me Bashkimin Evropian dhe aleancat perëndimore.
BE mbetet në pritje të veprimeve konkrete të Serbisë që të dëshmojë përkushtimin e saj ndaj integrimit evropian dhe bashkëpunimit me bllokun.
Situata mbetet e tensionuar ndërsa vëmendja evropiane është kthyer fuqishëm drejt Ballkanit Perëndimor, në prag të sfidave të reja gjeopolitike.
