Presidenti i SHBA-së, Donald Trump, ka deklaruar se një marrëveshje për armëpushim mes Izraelit dhe Hamasit mund të arrihet që gjatë javës së ardhshme, pas një përgjigjeje që ai e përshkroi si “pozitive” nga Hamasi ndaj propozimit amerikan.
“Mund të ketë një marrëveshje për një armëpushim në Gaza deri javën e ardhshme,” tha Trump për gazetarët nga avioni presidencial Air Force One, duke shtuar se ende nuk është informuar për statusin përfundimtar të negociatave, raportoi Arab News.
Sipas agjencisë Anadolu, Hamasi ka bërë të ditur se ka paraqitur një përgjigje pozitive ndaj ndërmjetësve egjiptianë dhe katarianë dhe është “plotësisht i përgatitur për të hyrë menjëherë në një raund negociatash” që do të trajtonin mekanizmin për zbatimin e marrëveshjes.
Një zyrtar i Hamasit ka theksuar se grupi kërkon garanci për një tërheqje të plotë të forcave izraelite nga Gaza dhe për një armëpushim të qëndrueshëm. Trump, ndërkohë, thuhet se ka premtuar një armëpushim 60-ditor, që mund të zgjatet nëse është e nevojshme.
Dhuna në terren vazhdon
Paralelisht me këto përpjekje diplomatike, situata humanitare në Gaza po përkeqësohet. Të paktën 20 palestinezë u vranë të premten teksa përpiqeshin të merrnin ndihma humanitare, sipas Spitalit Nasser në Khan Younis. Sipas OKB-së, 613 palestinezë janë vrarë gjatë muajit të fundit vetëm gjatë përpjekjeve për të siguruar ushqim.
Në një tjetër sulm ajror izraelit në zonën Muwasi, u raportua vrasja e 15 personave, përfshirë 8 gra dhe një fëmijë, njoftuan burime spitalore. Ushtria izraelite është shprehur se po shqyrton incidentet.
Akuzat ndërkombëtare ndaj Izraelit
Që nga fundi i vitit 2023, Izraeli është akuzuar për fushatë gjenocidale në Gaza, me mbi 57.200 palestinezë të vrarë, shumica gra dhe fëmijë. Gjykata Ndërkombëtare Penale (ICC) në nëntor 2024 lëshoi urdhra arresti ndaj kryeministrit Benjamin Netanyahu dhe ish-ministrit të Mbrojtjes Yoav Gallant, për krime lufte dhe krime kundër njerëzimit.
Përveç kësaj, Izraeli përballet edhe me padinë për gjenocid të ngritur në Gjykatën Ndërkombëtare të Drejtësisë (ICJ) për veprimet e tij në enklavën palestineze.
Megjithëse rruga drejt një armëpushimi të qëndrueshëm duket ende e paqartë, deklarata e presidentit Trump dhe përgjigja pozitive e Hamasit ngrenë shpresat për një pauzë të përkohshme në luftimet dhe një hap të parë drejt zgjidhjes së krizës humanitare në Gaza.
