Në Likovë mbrëmë u hap Shtabi zgjedhor i Frontit Europian. I pranishëm ishte edhe kandidati për president Bujar Osmani, bartës i listës së kandidatëve për deputet në zonën e II-të zgjedhore, Sadulla Duraku, kandidatët për deputetë Skender Rexhepi Zejd, Elmi Aziri, Bastri Bajrami, ministrat Kreshnik Bekteshi dhe Jeton Shaqiri, si dhe deputeti Arbër Ademi.
“Nga Likova ka nisur dhe është zhvilluar përpjekja më e madhe për liri dhe barazi. Misioni i presidentit të parë shqiptar është pjesë e mozaikut të madh të lirisë, barazisë dhe fuqizimit të popujve këtu në Maqedoninë e Veriut. Këto nuk janë zgjedhje të rëndomta. Unë e di që ne politikanët e kemi zakon të themi se këto zgjedhje janë historike, por sinqerisht e them si vëllai juaj se këto zgjedhje nuk janë të rëndomta. Nga informacionet që i kam si ministër i jashtëm, nga kontaktet dhe qasjen që kam në diplomaci janë se në këto zgjedhje do të përcaktohet fati i të ardhmes së vendit tonë, të së ardhmes të secilit prej jush, secilit qytetarë të vendit tonë”, tha Osmani.
Ai heksoi se vendi ndodhet në një udhëkryq historik, në udhëkryq që ndodhen dy rrugë, ose do të përcaktojmë rrugën e të ardhmes së ndritshme europiane, ose do të zgjedhim rrugën e izolimit.
“Këto zgjedhje është bardh e zi. Prej secilit prej neve varet se çfarë drejtimi do të merr vendi jonë. Është bërë aq shumë këto vite, është transformuar shumë roli I shqiptarëve. Ju e dini si ka qenë fati jonë. Unë e kam kaluar vet me familje atë fat! Ju e keni kaluar vet! Kemi qenë popull i nënshtruar, i përjashtuar, margjinalizuar, jashtë institucioneve, jashtë universiteteve, dinjiteti i të cilëve ishte shkelur. Shqiptari atë e ka më të vështire ti shkelet dinjiteti prej çdo kujt. Dhe ne arritëm, bashkë të gjithë, ta institucionalizojmë dinjitetin e kombit tonë. Dhe nga popull i përjashtuar të bëhemi popull që ka kryeministër. Ky mision nuk është i përmbyllur pa e bërë edhe presidentin e parë shqiptar, për shkak se është simboli i barazisë, simboli i misionit të madh – se ne nuk jemi qiraxhinj në këtë shtet, po Zot”, u shpreh Osmani.
