Gazetari investigativ kroat, Domagoj Margetiç ka shpërthyer ndaj Presidentit serb Aleksandar Vuçiç, duke përsëritur akuzat e tij në lidhje me rolin e supozuar të udhëheqësit serb gjatë luftës në Bosnjë dhe Hercegovinë dhe rrethimit të Sarajevës.
Në një postim publik, Margetiç shkroi se Vuçiç vrau civilë gjatë rrethimit të Sarajevës dhe e akuzoi atë se po vazhdonte karrierën e tij politike në Serbi në vend që të përballej me përgjegjësi penale.
“Aleksandar Vuçiç vrau civilë gjatë rrethimit të Sarajevës. Në vend që të kalonte pjesën tjetër të jetës së tij në burg, ai sot po përgatitet për një karrierë politike në Serbi”, shkroi gazetari kroat.
Margetiç shkoi edhe më tej, duke shtuar se “çdo karrierë politike bazohet në vrasje”, ndërsa e lidhi drejtpërdrejt këtë çështje me akuzat e të ashtuquajturit “Safari i Sarajevës”.
Sipas tij, fakti që vrasjet e dyshuara dhe rasti i “safarive njerëzore” në Sarajevë nuk janë sqaruar plotësisht deri më sot, ka bërë që, sipas tij, Vuçiç të mos përballet me drejtësinë për ngjarjet e periudhës së luftës.
“Meqenëse vrasjet dhe safarit njerëzore nuk janë zgjidhur deri më sot, kjo është arsyeja pse ai nuk u ndal në Sarajevë“, shkroi Margetić.
Gazetari kroat ka publikuar dokumente dhe deklarata dëshmitarësh në muajt e fundit që ai pretendon se lidhen me rolin e Vuçiçit gjatë luftës në Bosnjë dhe Hercegovinë. Ai ka kërkuar që materialet që ka publikuar të hetohen nga institucionet kompetente.
