Shtetet e Bashkuara po përgatiten për një tjetër goditje ekonomike ndaj Iranit, me masa që pritet të prekin jo vetëm Teheranin, por edhe vendet dhe subjektet që vazhdojnë të bëjnë biznes me të.
Në prag të prezantimit të masave të reja, presidenti amerikan Donald Trump ka reaguar në Truth Social me një deklaratë të shkurtër dhe të fortë: “Irani po shembet plotësisht”.
Sekretari amerikan i Thesarit, Scott Bessent, pritet të japë detaje për zgjerimin e sanksioneve dytësore, në atë që është përshkruar si një “D-Day” ekonomike për Iranin.
Bessent kishte paralajmëruar më herët, përmes Financial Times, se Uashingtoni synon një ofensivë ekonomike të paprecedentë, me objektiv ndërprerjen e lidhjeve financiare që mbështesin regjimin iranian.
“Bota duhet ta kuptojë se objektivi ynë është të ndërpresim çdo litar jetese ekonomik që mbështet regjimin tiranik derisa Teherani të qëndrojë i vetëm”, shkroi ai.
Sipas Bessent, presioni amerikan mund të shtrihet edhe ndaj vendeve që vijojnë të bashkëpunojnë financiarisht me Iranin, të cilat mund të përballen me izolim.
Teherani paralajmëron për naftën dhe Hormuzin
Irani ka reaguar ndaj kërcënimeve amerikane duke paralajmëruar se, nëse konflikti vijon, mund të ndalojë eksportet e naftës nga rajoni.
Teherani ka paralajmëruar gjithashtu anijet që të mos kalojnë përmes Ngushticës së Hormuzit pa lejen e tij.
Zhvillimet në këtë pikë strategjike kanë rëndësi të veçantë për tregjet ndërkombëtare, pasi përmes Ngushticës së Hormuzit kalon zakonisht rreth një e pesta e naftës dhe gazit global.
Tensionet kanë dhënë tashmë efekte në ekonominë globale, veçanërisht përmes rritjes së çmimeve të naftës.
Masat e paralajmëruara vijnë pas disa ultimatumesh të mëparshme të administratës Trump, të cilat më pas janë zbutur për t’i lënë hapësirë përpjekjeve diplomatike.
