Zeqirija Ibrahimi është shprehur i kënaqur nga përfaqësimi i shqiptarëve në Qeverinë VMRO – VLEN – ZNAM.
Në DailyClick në TV21, Ibrahimi tha se do të dëshironin që shqiptarët ta marrin gjithë Qeverinë.
“Ne do të kishim dashur që ta marrim gjithë qeverinë vetëm ne, por në kuptimin e asaj se a janë të përfaqësuar shqiptarët në këtë pushtet – unë mund t’ju siguroj se shqiptarët janë mjaftueshëm mirë të përfaqësuar dhe çdo kund ku ne kemi ministrin, do të kemi edhe poste tjera shoqëruese të ministrit”, tha Ibrahimi.
Në kuptim të përqindjes ne si shqiptarë jemi të përfaqësuar në të gjithë pushtetin ekzekutiv diku mes 27 e sipër për qind. Këtë e deklaroi Sekretari i përgjithshëm i Alternativës, Zeqirija Ibrahimi, duke shtuar se kjo diku është 30% e diku 25% dhe kjo varet nga resori.
“Ne e kemi ruajtur përfaqësimin e shqiptareve në ekzekutiv. Në këtë aspekt kemi bërë edhe krahasime të sakta numerike, dhe jemi në ato pozicione që ka qenë edhe Qeveria e kaluar, LSDM-BDI-ASH”, tha Ibrahimi.
Ai shtoi se duhet të potencohet edhe një fakt tjetër se kur BDI ka bërë Qeveri me VMRO-në në vitin 2014, nuk i ka patur as gjysmën e këtyre resorëve dhe nuk ka patur as kryetarë të Kuvendit.
“Ne jemi në gjendjen kur kjo VMRO e ka siguruar shumicën edhe pa numrin e deputetëve shqiptarë kurse ne arrimë që ta imponojmë postin e kryetarit të Kuvendit”, deklaroi Ibrahimi.
Ai tha se koalicioni VLEN ka bërë një avancim shumë të lartë të përfaqësimit të shqiptarëve krahasuar me qeverisjet e kaluara të BDI-së me VMRO-në .
“Unë mund t’ju sigurojë që shqiptarët janë mjaftueshëm mirë të përfaqësuar edhe aty ku nuk do e kemi ministrin, do të kemi në postet e tjera ndër ministrin me të cilin do të jemi të përfaqësuara edhe në si shqiptarë”, tha Ibrahimi.
