Ngushtica Bab al Mandeb lidh jo vetëm Detin e Kuq dhe Detin Arabik, por u jep anijeve që vijnë nga ky i fundit qasje në Kanalin e Suezit…
Në reagimin e tij ndaj sulmit të Izraelit ndaj Libanit, Irani ka kërcënuar të “aktivizojë fronte të tjera”, siç është Ngushtica Bab al Mandeb. Por ku ndodhet dhe sa e rëndësishme është kjo rrugë ujore për tregtinë globale?
-Lidhja midis Detit të Kuq dhe Detit Arabik
Ngushtica Bab al-Mandeb lidh Detin e Kuq dhe Detin Arabik. Gjithashtu quhet “porta e lotëve” për kushtet e rrezikshme të lundrimit. Kufizohet me Jemenin, ku është edhe baza e Huthëve, një forcë e ndërmjetme iraniane.
-Sa e rëndësishme është ngushtica?
Ngushtica Bab al Mandeb lidh jo vetëm Detin e Kuq dhe Detin Arabik, por u jep anijeve që vijnë nga ky i fundit qasje në Kanalin e Suezit, që ndodhet më lart. Është një nga rrugët më të rëndësishme në botë për transportin detar të mallrave, veçanërisht të naftës bruto nga Gjiri që shkon drejt Mesdheut.
Profesori Samir Dani i Shkollës së Biznesit të Universitetit Keele ka deklaruar se nëse sulmet iraniane përreth Suezit do të çonin në një mbyllje efektive atje, përçarja do të shkonte përtej naftës dhe gazit.
“Mbyllja e Kanalit të Suezit do të shkaktonte kaos dhe rrëmujë të mëtejshme në të gjithë botën, jo vetëm në lidhje me naftën dhe gazin, por edhe duke bllokuar rrugën e zinxhirit të furnizimit të mallrave të përditshme nga Azia në Evropë… Mbyllja e rrugës së Detit të Kuq do të çonte në drejtimin e anijeve nga Azia në Evropë rreth Kepit të Shpresës së Mirë, duke çuar në një kohë udhëtimi prej mesatarisht 15 ditësh (nëse jo më shumë), kërkesa shtesë për karburant dhe në përgjithësi, një rritje të shpejtë të kostove të transportit që do të rrjedhin deri te konsumatorët”, tha ai.
-Kush janë Huthitët dhe çfarë mund të bëjnë ata?
Huthitët janë aleatët shiitë të Iranit në Jemen dhe më parë kanë rrezikuar transportin detar përmes këtij kanali. Në mbështetje të Hamasit në luftën e Gazës, ata goditën objektiva përtej Jemenit dhe ndërprenë rrugët detare rreth Gadishullit Arabik dhe Detit të Kuq.
“Ngushtica Bab el Mandeb mund të bëhet e rrezikshme nga Huthit, siç e kanë provuar, por në një mënyrë më të lehtë”, thotë analisti ushtarak Michael Clarke.
Huthët deri më tani kanë qëndruar kryesisht jashtë konfliktit aktual, me diplomatë dhe analistë që thonë se grupi po priste një moment të përshtatshëm për të ushtruar presion maksimal.
“Deri më tani, Irani po ecën mirë dhe po e mposht armikun çdo ditë dhe beteja po shkon në drejtimin e tij. Nëse ndodh diçka në kundërshtim me këtë, atëherë mund të vlerësojmë”, tha një udhëheqës i Huthit për Reuters në fund të marsit.
