Kanë filluar të arrijnë haxhilerët e parë nga rajoni i Tetovës, të cilët suksesshëm kanë përmbushur kushtin e pestë të Islamit – kryerjen e Haxhit në vendet e shenjta. Ditën e djeshme, Aeroporti Ndërkombëtar i Shkupit u përfshi nga emocione të papërshkruara dhe lot gëzimi gjatë aterrimit të grupit të parë të besimtarëve.
Ambientet e aeroportit ishin të mbushura plot me familjarë, miq e të afërm, të cilët kishin dalë për t’u uruar mirëseardhje haxhilerëve pas përfundimit të këtij udhëtimi të rëndësishëm shpirtëror.
Dinamika e kthimit të grupeve të tjera
Myftinia e Tetovës njofton opinionin mbi ecurinë dhe dinamikën e kthimit të besimtarëve të mbetur:
- Grupi i parë: Ka arritur me sukses gjatë ditës së djeshme, duke shënuar fillimin e mbarë të kthimit të haxhilerëve në vendlindje.
- Grupet e radhës: Procesi i transportit ajror dhe kthimit të besimtarëve pritet të përmbyllet plotësisht këtë të shtunë. Në këtë ditë do të arrijnë edhe dy grupet e fundit të haxhilerëve nga rajoni i Tetovës.
“Lusim Zotin e Madhëruar që t’ua ketë pranuar Haxhin, lutjet dhe të gjitha ibadetet e tyre, si dhe t’i kthejë shëndoshë e mirë të gjithë haxhilerët tanë pranë familjeve dhe vatrave të tyre familjare!” – thuhet në urimin e Myftinisë.
