Kosova po hyn në një fazë të re politike pas formimit të Qeverisë Kurti 4, por përballë saj mbeten një sërë sfidash të rëndësishme, nga çështja e zgjedhjes së presidentit dhe përçarjet brenda LDK-së, deri te marrëdhëniet me Shtetet e Bashkuara dhe Bashkimin Evropian. Në këtë situatë, vëmendje të veçantë pritet të marrë edhe vendimi i Dhomave të Specializuara në Hagë ndaj ish-krerëve të UÇK-së, i cili mund të ndikojë në atmosferën politike dhe shoqërore në Kosovë.
Në një intervistë për “Bota sot”, eksperti amerikan për Ballkanin, Daniel Serwer, vlerëson se prioriteti i Kosovës në politikën e jashtme duhet të jetë përgatitja për anëtarësim në NATO në vitin 2028 dhe më pas për anëtarësimin në Bashkimin Evropian. Serwer thotë se marrëveshja LVV-LDK për Bekim Sejdiun mund të rrezikohet nga kundërshtimi i gjashtë deputetëve të LDK-së, ndërsa paralajmëron se një tjetër proces zgjedhor nuk do të ishte zgjidhja më e mirë.
Ai shprehet kritik ndaj ndërhyrjes së Richard Grenellit në zhvillimet politike në Kosovë, duke thënë se ai nuk është pjesë e administratës amerikane. Serwer gjithashtu thekson nevojën për përmirësimin e marrëdhënieve të Kosovës me SHBA-në dhe BE-në, ndërsa për vendimin e Hagës apelon për reagime të moderuara dhe paqësore, pavarësisht rezultatit.
