Në selinë e LSDM-së në Shkup u mbajt takimi me udhëheqës të partive simotra të Partive Socialiste Evropiane (PES), ku i pranishëm ishte edhe kryeministri i Kosovës Albin Kurti i cili është edhe kryetari i Lëvizjes Vetëvendosje.
Pas këtij takimi, kryetari i LSDM-së Dimitar Kovaçevski i pyetur për zhvillimet brenda ASh-së të cilat reflektuan edhe në përbërjen Qeveritare tha se:
“Në vendin tonë ka parti politike të cilat janë PRO integrimeve europiane. Ne nuk mund integrimin europian të shtetit ta kufizojmë me atë se z.Taravari ka kaluar nga pushteti në opozitë. Unë nuk mendoj se Taravari është figura kryesore e ardhmërisë së shtetit. Bëhet fjalë për politikan nga Gostivari, mjek i suksesshëm i cili bën kalkulime politike, por ardhmëria e shtetit nuk mund të varet nga një njeri ose një parti politike.”- deklaroi Dimitar Kovaçevski – kryetar i LSDM-së.
Kryetari i LSDM-së gjithashtu shtoi se Pa LSDM nuk ka Maqedoni Europiane.
“Diçka të ju them, pa LSDM nuk ka Maqedoni Europiane dhe këtë e kanë konfirmuar 32 vjet të historisë së shtetit. Ne kemi pasur qeveri të mëparshme të cilat i ka udhëhequr VMRO DPMNE dhe që nuk kanë bërë asnjë milimetër drejt integrimit. 11 vjet asnjë përmirësim i marrëdhënieve me fqinjët, përkundrazi, përkeqësim, asnjë përmirësim në mes bashkësive etnike në vend, përkundrazi përkeqësim.”- tha Dimitar Kovaçevski – kryetar i LSDM-së.
Reaguan nga VMRO DPMNE. Nga atje përmes një kumtese thonë se Dimitar Kovaçevski është shkëputur totalisht nga realiteti. “Le ta informojë dikush LSD-në dhe Kovaçevskin se Maqedonia ende nuk i ka filluar negociatat me Bashkimin Evropian dhe fajin e ka ai dhe qeveria e LSD – BDI-së”, thonë nga VMRO DPMNE