Presidenti amerikan Donald Trump planifikon të ecë përpara me shitjen e dhjetëra motorëve avionësh Turqisë, në një marrëveshje me vlerë qindra milionë dollarë, pavarësisht kundërshtimeve të shprehura në Kongresin amerikan. Lajmi u bë i ditur nga Reuters, duke cituar katër burime të informuara mbi çështjen.
Motorët, të prodhuar nga kompania amerikane General Electric, do të përdoren për avionin e parë luftarak të prodhimit vendas të Turqisë, “Kaan”, një projekt strategjik i nisur në vitin 2016 si pjesë e përpjekjeve të Ankarasë për të rritur pavarësinë e saj në industrinë e mbrojtjes. Sipas njërit prej burimeve, vlera e paketës do të kalojë 700 milionë dollarë.
Vendimi konsiderohet një sinjal pozitiv ndaj Turqisë përpara samitit të NATO-s, që do të zhvillohet në vend më 7 dhe 8 korrik.
Marrëdhëniet mes Turqisë dhe Shteteve të Bashkuara kanë qenë përgjithësisht të mira gjatë presidencës së Trumpit, i cili ka vlerësuar shpesh presidentin turk Recep Tayyip Erdoğan. Megjithatë, dy vendet vazhdojnë të kenë mosmarrëveshje për përjashtimin e Turqisë nga programi i avionëve F-35 dhe sanksionet e vendosura pas blerjes së sistemit rus të mbrojtjes ajrore S-400.
Sipas Reuters, deputeti demokrat Gregory Meeks, anëtar i lartë i Komisionit të Punëve të Jashtme në Dhomën e Përfaqësuesve, ka shprehur kundërshtime gjatë procesit të shqyrtimit të marrëveshjes dhe ende nuk ka dhënë miratimin e tij.
Megjithatë, burimet thonë se shitja pritet të finalizohet në ditët në vijim, ndërsa Departamenti amerikan i Shtetit do t’i dërgojë më pas njoftimin zyrtar Kongresit.
Vendimi vjen pothuajse një vit pasi ministri i Jashtëm turk Hakan Fidan kishte kritikuar publikisht vonesat në procedurat e miratimit të marrëveshjes.
Turqia do të presë liderët e NATO-s në fillim të korrikut, në një kohë kur aleanca po përballet me debate mbi shpenzimet e mbrojtjes, ndarjen e barrës mes aleatëve dhe tensionet e lidhura me sigurinë në Lindjen e Mesme.
