Pavarësisht akuzave të Prokurorisë ndaj Artan Grubit, partitë politike, pjesë e Frontit Europian për momentin nuk kanë plan të distancohen nga BDI-ja. Ziadin Sela thotë se asnjëherë nuk ka qenë i varur nga veprimet e dikujt ndërsa atë që po ndodh në BDI e cilëson si problem i brendshëm i tyre. Ai tha se veprimet e Grubit s’mund të ndikojnë në ASH. Sela i bëri thirrje Grubit që të paraqitet para drejtësisë.
“Aleanca për Shqiptarët kurrë veprimin e vet politik nuk e ka bazuar te dikush tjetër. Duhet ndarë këto gjëra. Ne jemi në koalicion bashkë me shumë subjekte politike në kuadër të Frontit Europian dhe nuk ka se kjo të ndikojë te ASH. Çdoherë kemi qenë vetvetja dhe do të vazhdojmë të jemi vetvetja”, deklaroi Ziadin Sela, ASH.
Aleanca vazhdon me Frontin Europian apo jo?
“Po natyrisht”, u përgjigj Sela.
Kreu i Lëvizjes Populli, Skender Rexhepi, ka dyshimet e tij në drejtësinë e vendit. Shprehet se duke pasur parasysh fjalorin e deritanishëm të Qeverisë, mund të ketë hapësirë për revanshizëm. Fronti Europian tani duhet të jetë më i bashkuar se sa para zgjedhjeve tha Rexhepi.
“Është çështje personale e tij. Unë personalisht konsideroj që çdokush duhet të rrijë në vendin e tij dhe në kohën që ke shfrytëzuar të gjitha beneficionet në të qenit këtu, duhet edhe të rrish në përgjegjësi, duke mos paragjykuar fajësinë apo pafajësinë e tij. Konsideroj që çdokush duhet të ballafaqohet por besoj që herët ose vonë do të kthehet të ballafaqohet derisa të krijohet një klimë e cila do të jetë vërtetë objektive për trajtimin e rastit të tillë sepse ne e dimë se Qeveria po bënë gjuajte shtrigash ndaj individëve dhe jorastësisht e përdorë për qëllime politike ditore”, u shpreh Skender Rexhepi – LP/FE.
Kontaktuam edhe kreun e PDT-së, Bejxhan Iljas. Ai tha se nuk largohet nga Fronti Europian ndërsa zhvillimet brenda BDI-së i cilësojnë si probleme brendapartiake. Tentuam të biem në kontakt edhe me deputetin Salih Murat, por i njëjti nuk ishte i disponueshëm në telefon. Kujtojmë se nga Fronti Europian, para pak muajsh u tërhoq PDSH-ja e Menduh Thaçit. /Alsat.mk
