Presidenti rus Vladimir Putin ka deklaruar se lufta në Ukrainë po i afrohet fundit, duke argumentuar se zhvillimet në fushën e betejës tregojnë një avantazh në rritje për forcat ruse.
Gjatë një deklarate mbi ecurinë e pushtimit të plotë të Ukrainës, Putin tha se ka arritur në këtë vlerësim pas analizës së situatës në front, ku sipas tij ushtria ruse po avancon “në të gjitha drejtimet”.
Megjithatë, lideri i Kremlinit refuzoi të japë ndonjë afat konkret për përfundimin e luftimeve, duke argumentuar se dinamika e konfliktit mbetet e paparashikueshme.
“Ka kontakte lidhur me situatën në Ukrainë, por aktualisht nuk ka negociata formale”, u shpreh Putin, duke lënë të kuptohet se kanalet e komunikimit mbeten të hapura pa prodhuar ende një proces diplomatik të strukturuar.
Presidenti rus vuri theksin edhe te nevoja për forcimin e sistemeve të mbrojtjes ajrore të Rusisë, ndërsa sulmoi ashpër mediat perëndimore, të cilat i cilësoi si “turp dhe makth”, duke i akuzuar se po dezinformojnë opinionin publik dhe po injorojnë atë që ai e quajti “tragjedia në Starobilsk”.
