Drejtori i Fondit Shëndetësor, Sasho Klekovski thotë se gjendja e rënduar në sistemin shëndetësor është si rezultat i krimit dhe korrupsionit. Sa i përket institucionit që udhëheqë, ai thotë se punojnë me një strategji pune të vjetërsuar, që nga viti 2015.

“Është e qartë se pjesa më e madhe e problemeve në sistemin shëndetësor janë të shkaktuara nga krimi dhe korrupsioni. Do doja të thosha se institucioni im ka strategji “copy-paste” nga viti 2015, dhe tani më disa vite nuk ka plan vjetor për punë. Pothuajse të gjitha qendrat e fondit ose janë në status quo, ose kemi prapambetje nga viti 2014”, deklaroi Sasho Klekovski, drejtor i Fondit Shëndetësor.

Si pasojë e mungesës së një regjistri, drejtori i Fondit Shëndetësor thotë se harxhohen para pa kontroll, sepse nuk e dinë se sa të sëmurë ka dhe nga cilat sëmundje vuajnë.

“Ne nuk e dimë gjendjen reale, për sëmundjet e diabetit dhe sëmundje të rralla, nuk ka regjistër funksional. Kur do pyesni, se kush janë këto pacientë, nga janë, merrni përgjigje të pjesshme dhe jo të plota”, shtoi Sasho Klekovski, drejtor i Fondit Shëndetësor.

Sipas një studimi të kryer nga profesori në fakultetin e Ekonomisë Shëndetësore në Hollandë, rezulton që qytetarët në Maqedoninë e Veriut paguajnë shumë shtrenjtë për shërbimet shëndetësore.

“Pacientët në Maqedoni paguajnë më shumë nga harxhimi i përgjithshëm, ndërsa më pak paguhet në formë kolektive, nëpërmjet sistemit tatimor apo përmes sigurimeve shoqërore. Maqedonia ashtu edhe si vendet e tjera të rajonit kanë një krahasim negativ në pagesat private, ku në vendet tjera është rreth 15 për qind, ndërsa në Maqedoni rreth 40 për qind”, shtoi Vim Grot, profesor në fakultetin e Ekonomisë Shëndetësore, në Hollandë.

Rita Coulombia, përfaqësuese e Maqedonisë në Kombet e Bashkuara tha se vendit i nevojitet digjitalizimi i sistemit shëndetësor. /Alsat.mk