Ardhja nga një shtet tjetër në Kosovë për të jetuar, po ia mban peng paratë që i takojnë.
Romina Gjinali, e cila para më shumë se një viti erdhi nga Tirana për të jetuar në Prishtinë, edhe pse ka 3 muaj që ka lindur djalin e saj, shtesat e lehonave prej 170 eurove nuk po arrin t’i marrë, raporton Kiks Kosova.
Ballafaqimin me këtë problem Gjinali e pati në momentin që tentoi të aplikojë përmes platformës elektronike eKosova.
Ende pa vazhduar tutje, aplikimi iu pengua me rikujtimin që nuk është shtetase e Republikës së Kosovës.
Ky mesazh nuk e ndali Gjinalin që të vazhdojë tentimet e saj për të kuptuar se ku qëndron problemi dhe si ta zgjidhë atë.
Ndonëse tentoi disa herë të pyes personat përkatës për shtesat e saj, ajo gjithmonë u kthye mbrapa pa një përgjigje e informatë të detajuar.
Meqenëse Ministria e Financave, të cilës ajo iu drejtua me pyetje për rastin e saj, nuk i sqaroi asnjë gjë, tiranasja zgjidhje e pa të bisedonte me një eksperte të financave.
Ekspertja ia tha atë që veçse ia kishte kumtuar eKosova, faktin se ajo nuk është shtetase kosovare por shtetase e Shqipërisë.
Gjinali pretendon që kjo është e padrejtë, ngase sipas saj ajo i kryen të gjitha obligimet ndaj shtetit ku edhe është shpërngulur tani.
Shtetasja shqiptare, e cila ka jetuar në Shqipëri, me shpërnguljen e saj në Kosovë i janë bllokuar përfitimet në dy anë.
Në Shqipëri nuk i përfiton këto shtesa sepse është shpërngulur në Kosovë, ndërsa në Kosovë për faktin se është shtetase shqiptare.
Romina Gjinali do të vazhdojë të kërkojë atë që i takon çdo nëne tjetër e cila jeton dhe vepron në Kosovë.
