Kompania ajrore gjermane “Lufthansa” ka vendosur të vazhdojë fluturimet midis Frankfurtit dhe Shkupit edhe gjatë gjithë sezonit dimëror, megjithëse me një orar të reduktuar, njoftoi portali “Ex Yu Aviation”.
Në maj të këtij viti, kompania kishte paralajmëruar pezullimin e fluturimeve nga 1 shkurt deri më 28 mars 2026, gjatë sezonit dimëror 2025/26, i cili zgjat nga 26 tetori deri më 28 mars. Megjithatë, këtë javë “Lufthansa” rishikoi planet e saj dhe vendosi të operojë tre fluturime javore midis Shkupit dhe Frankfurtit – të hënave, të premteve dhe të dielave – gjatë muajve shkurt dhe mars. Ky është një reduktim krahasuar me dhjetë fluturime javore në të njëjtat muaj këtë vit.
Fluturimet do të realizohen me aeroplan Airbus A319. Sipas orarit aktual, kompania planifikon dhjetë fluturime javore në nëntor dhe dhjetor, ndërsa në janar do të ketë shtatë rotacione javore. Orari i janarit nuk do të përfshijë shërbim ditor, por dy fluturime në ditë të zgjedhura të javës.
“Lufthansa”, e subvencionuar nga Qeveria e RMV-së, operon në linjën Shkup-Frankfurt që nga prilli 2023, duke transportuar 73,456 pasagjerë atë vit, ndërsa në 2024 numri u rrit në 105,653.
Ministria e Transportit këtë muaj paralajmëroi pesë linja të reja ajrore nga Aeroporti i Shkupit. Nga nëntori, me “Wizz Air” do të ketë fluturime për në Madrid dhe Stokholm, ndërsa nga dhjetori do të nisë shërbim për në Pragë, Bari dhe Këln. Gjithashtu pritet të hapet linja e paralajmëruar për Larnaka, Qipro.
Në gjysmën e parë të këtij viti, nga Aeroporti i Shkupit dhe ai i Ohrit janë transportuar gjithsej 1,5 milion pasagjerë, një rritje prej 5 për qind dhe 11 për qind përkatësisht.
